Բելառուսի նախագահ Ալեքսանդր Լուկաշենկոն հայտարարել է, որ Բելառուսն առաջիկայում որոշում կկայացնի ԴԺՀ և ԼԺՀ ճանաչման մասին՝ հարցն օրակարգում է, հայտնում է «Բելտա» գործակալությունը։
«Այդ հարցը մեր օրակարգում է, և առաջիկայում կանենք այնպես, ինչպես պետք է և մեզ, և Ռուսաստանին»,-ասել է նա։
Լուկաշենկոն նաև ասել է, որ որոշ երկրներ արդեն հասցրել են հայտարարել, թե ԴԺՀ և ԼԺՀ ճանաչման կամ չճանաչման հարց իրենց օրակարգում չկա։
«Իսկ մեր օրակարգում կա»,- ասել է նա։
Ավելի վաղ Լուկաշենկոն հայտարարել էր, որ կարող է պայմանավորվել ՌԴ նախագահի հետ՝ ինչպես վարվել այդ հարցում։ Նա նշել էր, որ Մինսկի համար առանցքային է խաղաղության հաստատումը Դոնբասում։
Լուկաշենկոն ասել է նաև, որ ՌԴ նախագահ Վլադիմիր Պուտինը երդվել է, որ ցանկացած հարձակում և սահմանից այս կողմ գեթ մեկ քայլ դեպի Բելառուսի տարածք, կնշանակի հարձակում Ռուսաստանի վրա։
ՌԴ նախագահ Վլադիմիր Պուտինը հայտարարել է Դոնբասում հատուկ ռազմական գործողության մասին։ Նա ասել է, որ նպատակը մարդկանց պաշտպանելն է, որոնք «ենթարկվում են ցեղասպանության Կիևի ռեժիմի կողմից»։ Պուտինը հավելել է, որ ՌԴ-ն ձգտելու է Ուկրաինայի «ապառազմականացմանը և ապանացիֆիկացիայի»։ Ուկրաինայի ամբողջ տարածքում ռազմական դրություն է հայտարարվել։ Զելենսկին հայտարարել է ՌԴ հետ հարաբերությունները խզելու մասին։
ԱՄՆ նախագահ Ջո Բայդենը, իր հերթին, հայտնել է, որ ՌԴ նախագահ Վլադիմիր Պուտինն ընտրել է միտումնավոր պատերազմը, որը աղետալի զոհերի և տառապանքների է հանգեցնելու և ասել, որ «միասնական և վճռական պատասխան է լինելու»։