Ազգային ժողովում քննարկվել և առաջին ընթերցմամբ ընդունվել է «Դիվանագիտական ծառայության մասին» օրենքում փոփոխություններ և լրացումներ կատարելու մասին» օրենքի նախագիծը:

Նախագծի հեղինակներն են «Քաղաքացիական պայմանագիր» խմբակցության պատգամավորներ Վլադիմիր Վարդանյանը և Հռիփսիմե Գրիգորյանը։

Վլադիմիր Վարդանյանը, նշելով, որ վերջին մոտ 20 տարում էական փոփոխություններ օրենքում չեն կատարվել, ասել է, որ որոշակի շտկումների անհրաժեշտություն է առաջացել։

Առաջարկվում է ԱԳ նախարարության աջակցող կառուցվածքային ստորաբաժանումներում ներդնել քաղաքացիական ծառայության համակարգը: Գլխավոր քարտուղարը, որը դիվանագիտական պաշտոն է, կունենա տեղակալ, որը կհամարվի քաղաքացիական ծառայող և կհամակարգի աջակցող մասնագիտական կառուցվածքային ստորաբաժանումների աշխատանքը:

Փոփոխություն է առաջարկվում նաև դիվանագիտական աստիճանների սանդղակում՝ կփոխվեն 2-րդ և 3-րդ քարտուղարների դասային աստիճանները:

3-րդ փոփոխությունը վերաբերում է հերթական դիվանագիտական աստիճանի շնորհման ժամկետների փոփոխությանը: Հաշվի է առնվում այն հանգամանքը, որ ՀՀ արտաքին գործերի նախարարության աշխատակազմում կամ առանձնացված ստորաբաժանումներում ծառայության ժամկետն առնվազն երկու տարի է, իսկ դրանից հետո օտարերկրյա պետություններում ՀՀ դիվանագիտական ներկայացուցչություն կցորդի աստիճանով գործուղվող դիվանագետների համար խնդիրներ են առաջանում համապատասխան մարմինների հետ շփումներում, քանի որ բազմաթիվ երկրներում կցորդները համարվում են տեխնիկական աշխատակիցներ:

Այս փոփոխությունը հնարավորություն կտա օտարերկրյա պետություններում և միջազգային կազմակերպություններում ՀՀ դիվանագետներին գործուղել առնվազն 3-րդ քարտուղարի դիվանագիտական աստիճանով՝ ավելացնելով աշխատանքի արդյունավետությունը:

Փոփոխության կենթարկվի նաև դիվանագիտական անձնագրերի տրամադրման, վերադարձման, պահպանման կարգը:

Ըստ նախագծի՝ դիվանագիտական անձնագիրը տրամադրելու է ԱԳՆ-ն` ՀՀ քաղաքացու անձնագրի հիման վրա՝ առավելագույնը հինգ տարի վավերականության ժամկետով, բայց ոչ ավելի, քան «Հայաստանի Հանրապետության քաղաքացու անձնագրի մասին» օրենքի 4-րդ հոդվածի 2-րդ մասով սահմանված ժամկետները: