«Ժառանգություն» կուսակցության նախագահ Րաֆֆի Հովհաննիսյանն ասուլիսում հայտարարել է, որ Սարդարապատից 105 տարի անց կանգնած ենք վերջին Հանրապետության կորստի նախաշեմին, «եթե շարունակենք այս նույն ընթացքով գնալ»։
«105 տարի առաջ այս օրը Սարդարապատում և հարակից ճակատներում վճռվեց մեր ճակատագիրը և մեր ժողովուրդը Մեծ եղեռնի և հայրենազրկումի վերջին արարից երեք տարի անց, միասնական պայքարի միջոցով, բոլոր կուսակցությունները, շինական, հոգևորական, ոտաբոբիկ գյուղացի, մտավորական , գեներալ և շարքային զինվոր կարողացան թշնամուն կանգնեցնել Մայր Աթոռից և Երևանից ոչ շատ հեռու և ապահովելով մեր ժողովրդին վերջնական ոչնչացումից»,-ասել է նա, գրում է Panorama.am-ը։
Նրա խոսքով՝ այդ սերունդն 105 տարի առաջ ապահովեց պետության գոյությունը բազմահազարյա պետականության արևելյան ճակատում, որն այսօր փայփայում ու պահում ենք ամենադժվարին պայմաններում:
«Առաջին հանրապետության ժառանգության մեջ ենք ապրում և վերջին հանրապետության կորստի նախաշեմին ենք այսօր, եթե շարունակենք այս նույն ընթացքով գնալ»,-հայտարարել է Րաֆֆի Հովհաննիսյանը:
Նա ասել է, որ 5 տարի առաջ հայ ժողովուրդն ունեցել է արժանի վերելք, որը նախորդ ժամանակաշրջանի սխալների և արատներ հետևանք էր:
«Այդ պայքարը սեփականաշնորհվեց մի խմբակի, գործչի կողմից որը, պարզվեց, ուներ ծրագիր իշխանություն ունենալու, վայելելու և նաև նպատակներ իրագործելու։ 5 տարի անց ապրում ենք աննախադեպ վայրէջք, մեր պետականությունը կորցնելու իրական հնարավորություն՝ մեր իսկ ձեռքերով, մեր ապրելու օրերին, վկայությամբ և իր իսկ պաշտոնական արած խոսքերով, իր որոշումներով: Եթե որևէ բան չփոխենք միասին՝ մենք գնում ենք մեր երկիրը ցեղասպանության հանձնելու ընթացիկ, կազմակերպվող ծրագրին:
Կոլցո-2-ը՝ ընթացող կատարյալ շրջափակում է, ինքնիշխան հայրենի տարածքների սողացող օկուպացիա է և ինքն արդեն բացեիբաց խոստովանում է իր հանցակցությունը, որ ինքը գիտակցաբար հանձնում է պետական ինքնիշխան տարածքներ, պատճառում է հարյուրավոր և հազարավոր մահեր: Գիտակցաբար դրժում է պետական իր երդումը և բազմաթիվ դրվագներով խախտում Սահմանադրության պահանջը»,-ասել է նա:
Ըստ Հովհաննիսյանի՝ վարչապետ Նիկոլ Փաշինյանը ընտրվել է ժամանակին, բայց կորցրել է բովանդակային լեգիտիմությունը, միգուցե, ձևական լեգիտիմությունը պահպանել է և հայտնեց, որ կամք չունեցավ նոյեմբերի 9-ից հետո կամովի հեռանալ իշխանությունից:
«Նա գնում է պետական, ազգային քաղաքական դավաճանության»,-ասել է Րաֆֆի Հովհաննիսյանը և պնդելով որ, վարչապետ Նիկոլ Փաշինյանը պատերազմ է բերելու, հարցրել է, թե ինչպե՞ս ենք պատրաստվում դրան, ի՞նչ են անում պետական կառույցները, բայց վերջիններս պետք է քայլ կատարեն սահմանադրական կարգը վերականգնելու համար:
«Ժառանգություն» կուսակցության նախագահը հայտարարել է, որ ինքը, որպես քաղաքացի, բանաձևել է մոտեցումներ, ձևավորել վստահության խորհուրդ՝ տարբեր ոլոտների հարգանք վայելող մարդկանց, որոնք անձի շուրջ չեն հավաքվելու և ապահովելու են դեպի նոր Հայաստան անցումը:
«Թշնամին, Շառլ Միշելը, Վլադիմիր Վլադիմիրին, Էնթոնի Բլինքենը, աշխարհը ծայրից ծայր, ձախից աջ և մենք ինքներս՝ անկախ նրանից, թե ով, ինչպես է քվեարկեց, կամ իմ նման՝ չքվեարկել, պիտի իմանան, որ իր խոսքը, իր վարքը, ինքը սրանից հետո առոչինչ է»,-հայտարարել է Հովհաննիսյանը:
Մայիսի 25-ին Մոսկվայում տեղի է ունեցել Հայաստանի վարչապետ Նիկոլ Փաշինյանի, Ռուսաստանի նախագահ Վլադիմիր Պուտինի և Ադրբեջանի նախագահ Իլհամ Ալիևի հանդիպումը: Քննարկվել են տարածաշրջանային տրանսպորտային և տնտեսական ենթակառուցվածքների ապաշրջափակմանը վերաբերող հարցեր։ Պայմանավորվածություն է ձեռք բերվել աշխատանքները շարունակել մեկ շաբաթից՝ երեք երկրի փոխվարչապետերի հանդիպման շրջանակում:
