ՀՀ վարչապետ Նիկոլ Փաշինյանը Հանրային հեռուստատեսության եթերում, անդրադառնալով վճարված գումարի դիմաց ռուսական զենքը չստանալու փաստին, նշել է, որ քննարկվում է, թե ինչ մեխանիզմով կարելի է լուծել հարցը։
Նա նշել է, որ տարբերակներից մեկն այն է, որ ՌԴ–ն Հայաստանի պարտքը նվազեցնի զենքի համար վճարված գումարի չափով։
«Տարբերակներից մեկը կարող է լինել վճարված գումարի չափով Հայաստանի պարտքից նվազեցումը։ Գիտեք, որ ՌԴ-ն նույնպես սպառազինությունների կարիք ունի։ Մենք աշխատանքային ենք տրամադրված»,–ասել է վարչապետը՝ հույս հայտնելով, որ քննարկումները կբերեն արդյունքների։
Հայաստանի իշխանությունը բազմիցս հայտարարել է, որ Ռուսաստանը պայմանագրով նախատեսված զենք և ռազմատեխնիկա չի մատակարարել, սակայան, դրա գումարը փոխանցվել է ռուսական կողմին: Գումարը պաշտոնապես չի հրապարակվել։ Տարբեր տվյալներով խոսքը 200-250 մլն դոլարի մասին է։
