ՌԴ ԱԳՆ պաշտոնական ներկայացուցիչ Մարիա Զախարովան հայտարարել է, որ Մոսկվայում տեսնում են Երևանին վտանգավոր աշխարհաքաղաքական խաղերի մեջ ներքաշելու փորձերը։
Նա նաև ասել է, թե Արևմուտքն անտարբեր է «հայ բնակչության ճակատագրի հանդեպ», սակայն Ռուսաստանի համար Հայաստանի բարգավաճումը կարևորագույն նշանակություն ունի, հայտնում է ՏԱՍՍ–ը։
«2023–ի հեշտ տարի չէր շատ երկրների և աշխարհի շատ ժողովրդների համար։ Այն դյուրին չէր նաև Հայաստանի, մեզ բարեկամ ժողովրդի համար։ Մենք տեսնում ենք Երևանին էլ ավելի վտանգավոր աշխարհաքաղաքական խաղերի մեջ ներքաշելու փորձերը։ Մենք տեսնում ենք, թե ինչպես է Արևմուտքը բացարձակ անտարբեր հայ բնակչության, Հայաստանի ժողովրդի ճակատագրի նկատմամբ։ Նրանք օգտագործում են հայ ժողովրդի զգացմունքները, պատմական հիշողությունը, ցավն ու տառապանքը բացառապես սեփական շահերի համար»,- ասել է նա։
Զախարովան հավելել է, որ, հաշվի առնելով դաշնակցային բնույթի հարաբերությունները, Ռուսաստանը պատրաստ է ամեն կերպ նպաստել Հայաստանի խաղաղությանը, կայունությանը և բարգավաճմանը։
«Դա իսկապես կարևորագույն նշանակություն ունի մեզ համար»,- ասել ՌԴ ԱԳՆ պաշտոնական ներկայացուցիչը։
Վարչապետ Նիկոլ Փաշինյանը Սանկտ Պետերբուրգում Եվրասիական տնտեսական բարձրագույն խորհրդի հերթական նիստում հայտարարել է, որ ԵԱՏՄ-ն տնտեսական միավորում է, որը չպետք է ունենա քաղաքական և, առավել ևս՝ աշխարհաքաղաքական օրակարգ:
Փաշինյանը նաև ասել է, որև ԵԱՏՄ-ի ներսում կուտակվել են սկզբունքային բնույթ կրող մի շարք չլուծված խնդիրներ՝ ընդհանուր էներգետիկ շուկաների գործունեության մոտեցումները, սկզբունքները և մեխանիզմները համաձայնեցնելու վերաբերյալ հիմնարար լուծումների հասնելու հասունացած անհրաժեշտություն կա։
