Դատախազությունը կբողոքարկի Սերժ Սարգսյանին և մյուսներին արդարացնելու դատավճիռը: Այդ մասին ասել է Գլխավոր դատախազի խորհրդական Լուսինե Մարտիրոսյանը, տեղեկացնում է Factor.am-ը։
Երևանի ընդհանուր իրավասության դատարանն արդարացրել է ՀՀ երրորդ նախագահ Սերժ Սարգսյանին՝ հանցակազմի բացակայության հիմքով։ Արդարացվել են նաև գործով անցնող «Ֆլեշ» ընկերության սեփականատեր Բարսեղ Բեգլարյանը և նախկին գյուղատնտեսության նախարարության աշխատակից Գևորգ Հարությունյանը։
Նրանք մեղադրվում էին պետությունից առանձնապես խոշոր չափի յուրացում կատարելու համար։ Դատախազությունը պահանջել էր նրանց մեղավոր ճանաչել, բայց ազատել պատասխանատվությունից, քանի որ անցել է նրանց վերագրվող արարքի վաղեմության ժամկետը։ Պաշտպանական կողմն էլ պահանջել էր ճանաչել և հռչակել Սարգսյանի, Բեգլարյանի և Հարությունյանի անմեղությունը:
Արդարացման դատավճռի հրապարակումից հետո Սերժ Սարգսյանը լրագրողների հետ զրույցում կարծիք էր հայտնել, որ Դատախազությունը դատական ակտը կբողոքարկի։
Դատարանի որոշմամբ վերացվել են Սարգսյանի, Բեգլարյանի և Հարությունյանի խափանման միջոցները՝ երկրից բացակայելու արգելքը։
