Ռուսաստանի ԱԳ փոխնախարար Միխայիլ Գալուզինն ասել է, որ Մոսկվան վերահաստատում է Երևանի և Բաքվի հաշտեցմանն աջակցություն ցուցաբերելու իր պատրաստակամությունը։
Նա նշել է, որ ռուսական կողմը դրական է գնահատում Հայաստանի և Ադրբեջանի ԱԳ նախարարներ Արարատ Միրզոյանի և Ջեյհուն Բայրամովի` Ղազախստանում մայիսի 10-11–ին կայացած հանդիպումը, գրում է ՏԱՍՍ–ը։
«Այդ հանդիպումը կողմերին հնարավորություն տվեց առաջ շարժվել Հարավային Կովկասում խաղաղության և կայունության ճանապարհին։ Եվս մեկ կարևոր քայլ արվեց այդ ուղղությամբ։ Մոսկվան երկու անգամ՝ 2023–ի մայիսին և հուլիսին, հարթակ է եղել Բաքվի և Երևանի միջև բանակցությունների համար։ Պատրաստ ենք առաջիկայում ևս աջակցություն ցուցաբերել Ռուսաստանի երկու եղբայրական ժողովուրդների հաշտեցմանը, նպաստել փոխընդունելի և հավասարակշռված լուծումների որոնմանը՝ տարածաշրջանի բոլոր երկրների անվտանգությունն ու բարգավաճումն ապահովելու նպատակով»,–ասել է նա։
Դիվանագետը բարձր է գնահատել Աստանայի դերը, որը հարթակ է տրամադրել հայ-ադրբեջանական շփումների համար:
«Կարևոր է, որ նման հանդիպումներն ընթանում են 2020-2022 թվականների բարձր մակարդակի եռակողմ պայմանավորվածությունների հունով, որոնք, բացի խաղաղության պայմանագրի կնքումից, նախատեսում են Ադրբեջանի և Հայաստանի միջև տրանսպորտային և տնտեսական կապերի ապաշրջափակում, սահմանազատում, քաղաքացիական հասարակությունների գծով շփումների զարգացում», - նշել է Գալուզինը:
2024թ. մայիսի 10-11-ին Ղազախստանի Ալմաթի քաղաքում տեղի ունեցած բանակցություններում ՀՀ արտաքին գործերի նախարար Արարատ Միրզոյանը ե Ադրբեջանի ԱԳ նախարար Ջեյհուն Բայրամովը ողջունել են սահմանազատման հարցում առաջընթացը ե այդ ուղղությամբ ձեռք բերված պայմանավորվածությունները: Նախարարները ե նրանց պատվիրակությունները շարունակել են «Հայաստանի ե Ադրբեջանի միջե խաղաղության ե միջպետական հարաբերությունների հաստատման վերաբերյալ» երկկողմ համաձայնագրի նախագծի շուրջ քննարկումները: Կողմերը պայմանավորվել են շարունակել բանակցությունները բաց հարցերի շուրջ, որտեղ դեռ կան տարաձայնություններ:
