«Տավուշը հանուն հայրենիքի» շարժման առաջնորդ Բագրատ սրբազանը հունիսի 17–ին Բաղրամյան պողոտայում հանրահավաքի ժամանակ, խոսելով անելիքների մասին, ասել է, որ առաջիկա օրերին ծրագրում են այցելել շրջաններ, նաև այն հատվածներ, որտեղ ծառայել է սրբազանը։

«Շարժումը չպետք է սահմանափակվի մայրաքաղաքի փոքր կենտրոնով։ Այն պետք է ծավալվի ՀՀ ամբողջ տարածքով։ Շուտով դուք էլ որպես մասնակիցներ ոչ միայն ականատես կլինեք, այլև՝ ներգրաված։ Մենք ենք լինելու օրակարգ թելադրողը»,- ասել է նա, հայտնում է Panorma.am-ը։

Ինչ վերաբերում է շարժման քաղաքական լուծումներին, սրբազանն ասել է․ «Բոլոր լուծումները քննարկված են և ընդունելի են։ Բոլոր առաջարկները քննարկվում են, և բոլոր կողմերից ընդունելի են։ Մենք ժամանակի և արդյունավետության հարց ունենք։ Էդ թեման կգործի՝ ըստ նպատակահարմարության և ժամանակի, ոչ ոք դա չի բացառել։ Այո, մենք շատ ենք ուզում, որպեսզի ընդդիմադիր պատգամավորները վայր դնեն իրենց մանդատները։ Ոչ ոք կառչած չէ իր մանդատից, դրա ժամանակն էլ կգա։ Մեզ պետք է արդյունք արձանագրել»։

Նա նաև ասել է, որ ընդլայնելու են գործիքակազմը։

Սրբազանը հայտարարել է, որ հունիսի 12-ը, երբ ժողովրդի նկատմամբ բիրտ ուժից բացի, կիրառվեցին նաև լուսաձայնային նռնակներ, նոր խարան է գործող իշխանության ճակատին, գրում է Aysor.am-ը։

«Հունիսի 12-ը ևս մի անջնջելի խարան է այս իշխանության և նրա ստախոս ղեկավարի ճակատին։ Եվ դա վկայում է, որ ՀՀ քաղաքացին գտնվում է մի մեծ կալանավայրում, մեծ բանտում»,- ասել է նա։

Հունիսի 17–ին Ազգային ժողովի «Հայաստան» և «Պատիվ ունեմ» խմբակցությունների կողմից նախաձեռնած արտահերթ նիստը չի կայացել։ Նիստին չեն ներկայացել իշխող «Քաղաքացիական պայմանագիր» խմբակցության պատգամավորները։ Նիստի օրակարգում էր «Կառավարության հրաժարականի և նոր կառավարություն ձևավորելու անհրաժեշտության մասին» ԱԺ ուղերձի նախագիծը։

Հունիսի 12-ի երեկոյան Ազգային ժողովի մոտ վարչապետի հրաժարականը պահանջող «Տավուշը հանուն հայրենիքի» շարժման մասնակիցների և ոստիկանների միջև բախումներ են տեղի ունեցել, ոստիկանությունը լուսաձայնային նռնակներ է կիրառել։ Վնասվածք է ստացել 101 մարդ, այդ թվում՝ ոստիկաններ։ Ըստ Քննչական կոմիտեի՝ Բաղրամյան և Դեմիրճյան փողոցների խաչմերուկում «զանգվածային անկարգություններ կազմակերպելու և իրականացնելու դեպքի առթիվ քրվարույթ է նախաձեռնվել»։

Բագրատ սրբազանն, իր հերթին, ոստիկանական գործողությունները որակել է «ահաբեկչություն» խաղաղ հավաքի մասնակիցների, ինչպես նաև ԱԺ հարևանությամբ գտնվող այգում եղած քաղաքացիների նկատմամբ։