Իսրայելի վարչապետի գրասենյակի խորհրդական Դմիտրի Գենդելմանը հայտարարել է, որ Պաղեստինի պետությունը ճանաչելու Հայաստանի որոշումը բացասաբար կանդրադառնա Իսրայելի հետ հարաբերությունների վրա։
Նա զգուշացրել է, որ դա «լուրջ հետևանքներ կունենա», հայտնում է ՏԱՍՍ–ը։
«Հայաստանի կողմից Պաղեստինի պետության ճանաչումը պարգև է ՀԱՄԱՍ–ից և պաղեստինյան այլ խմբավորումների ահաբեկիչների ու մարդասպանների համար։ Այդ քայլը լուրջ երկարաժամկետ հետևանքներ կունենա Իսրայելի և Հայաստանի հարաբերությունների համար»,–նշել է նա։
Հունիսի 21–ին ՀՀ արտաքին գործերի նախարարությունը հայտարարություն է տարածել Պաղեստինի պետությունը ճանաչելու վերաբերյալ։ Նշվում է, որ Հայաստանը միջազգային տարբեր հարթակներում մշտապես հանդես է եկել պաղեստինյան հարցի խաղաղ և համապարփակ կարգավորման օգտին և պաշտպանել է իսրայելա-պաղեստինյան հակամարտության լուծման՝ «երկու պետություն» սկզբունքը:
Պաշտոնական Երևանի կողմից Պաղեստինի ճանաչումից հետո Իսրայելում ՀՀ դեսպան Արման Հակոբյանը կանչվել է երկրի ԱԳՆ։ Իսրայելի ԱԳՆ հայտարարության մեջ նշվում է, որ նրան կանչել են «խիստ դիտողություն» հայտնելու նպատակով:
