Ադրբեջանի նախագահ Իլհամ Ալիևի հատուկ ներկայացուցիչ Էլչին Յուսուբովը հայտարարել է, որ Բաքուն աշխատանքներ է տանում Ստեփանակերտը բնակեցնելու ուղղությամբ և որ այնտեղ արդեն 3000–ից ավելի մարդ է ապրում։ Այդ մասին նա ասել է «Կրթության և իրավապահ միջոցառումների դերը շրջակա միջավայրի ամրապնդման գործում» համաժողովի ժամանակ։

Նա հավելել է, որ բնակեցվում են նաև հարակից շրջանները, գրում է APA-ն։

«Նրանք պետական ձեռնարկությունների աշխատակիցներ են, գործարարներ։ Ներկայուսմ քաղաքում գործում է 43 օբյեկտ, որտեղ աշխատում է 322 մարդ։ Առաջիկայում նախատեսվում է ևս 37 օբյեկտի բացում։ Ղարաբաղյան համալսարանի բացումից հետո նախատեսվում է բնակիչների քանակի ավելացում և օբյեկտների բացում»,–ասել է նա։

Ադրբեջանը 2023–ի սեպտեմբերի 19-ին Արցախի դեմ լայնամասշտաբ հարձակում է իրականացրել՝ ամբողջությամբ զանգվածային հրետակոծության տակ առնելով երկիրը։ Արդյունքում մեկ օր անց՝ սեպտեմբերի 20-ին ԱՀ իշխանություններն ընդունել են ռուսական խաղաղապահ առաքելության հրամանատարության առաջարկը կրակի դադարեցման վերաբերյալ՝ համաձայնվելով Բաքվի պայմաններին՝ ՊԲ զինաթափում ե Արցախի Հանրապետության լուծարում։ Սեպտեմբերի 24-ից արցախցիների բռնի տեղահանում է սկսվել, 100,000–ից ավելի մարդ է բռնի տեղահանվել Հայաստան: Ըստ որոշ տվյալների, Արցախում մոտ 40 հայ է մնացել։ Սեպտեմբերի 28–ին ԱՀ նախագահ Սամվել Շահրամանյանը հրամանագիր է ստորագրել ԱՀ լուծարման մասին, որը ուժի մեջ է մտել 2024–ի հունվարի 1–ից։