Երևանն իր բյուջեից 50 միլիոն դրամ կհատկացնի աղետի գոտի համարվող Ալավերդի համայնքին: Հարցը Երևանի ավագանու՝ հունիսի 25-ի նիստում ներկայացրեց «Քաղաքացիական պայմանագիր» խմբակցության անդամ Լուսինե Գևորգյանը:

Գումարը հատկացվել է Երևանի՝ 2024-ի բյուջեի վարչական մասի պահուստային ֆոնդից, հայտնում է «Հայկական ժամանակը»։

Նախագիծն ընդունվել է 56 կողմ ձայնով:

Մայիսի 26–ի հորդառատ անձրևներից հեղեղումների և Դեբեդ գետի վարարման հետևանքով կա 4 զոհ, որոշ բնակավայրերի հետ կապ չկա։ Տավուշի մարզում փլուզվել է 2 կամուրջ, վնասվել՝ 1-ը, փլուզվել են 3 բնակելի տուն, ջրալցվել՝ 45 տուն, 2 հյուրանոց, 18 հասարակական և այլ նշանակության օբյեկտներ։ Լոռու մարզում Դեբեդ գետի վարարման հետևանքով Մ6 ավտոճանապարհի Վանաձոր-Ալավերդի հատվածի 31-րդ կմ-ը հեղեղվել է, և մոտ 50 մ երկարությամբ հատվածը փլուզվել է, վնասվել են գետի վրայով անցնող 3 կամուրջներ և տարբեր նշանակության 70 շենք-շինություններ։