Հակակոռուպցիոն դատարանում վերսկսվել են Մարտի 1-ի գործով դատական լսումները։ ՀՀ երկրորդ նախագահ Ռոբերտ Քոչարյանը ներկա չի եղել նիստին, գրում է Sputnik Արմենիան։
Քոչարյանի գրասենյակի ղեկավար Բագրատ Միկոյանը Telegram–ում գրել է, որ Քոչարյանը նիստին չի մասնակցում, քանի որ համապատասխան ծանուցում չի ստացել։ Նա հավելել է, որ միաժամանակ ՀՀ երկրորդ նախագահն այս պահին Հայաստանում չէ։
«Նա մասնավոր այցով գտնվում է արտերկրում, ուր մեկնել է սեպտեմբերի 18-ին ՝ մինչ նիստի նշանակումը: Մոտ օրերս նախագահը վերադառնալու է և պատշաճ ծանուցման դեպքում կներկայանա դատարան»,- գրել է Միկոյանը։
Դատարանը երկար ժամանակ քննում էր հարցը՝ արդյոք իրավազո՞ր է նիստն անցկացնել Ռոբերտ Քոչարյանի բացակայությամբ, անգամ խնդրանքով դիմել են ԱԺ «Հայաստան» խմբակցության անդամ Արմեն Գևորգյանին՝ կապ հաստատել Ռոբերտ Քոչարյանի հետ՝ հասկանալու համար կարո՞ղ է ներկայանալ, թե՞ ոչ։
Ի վերջո, դատարանը որոշեց նիստը շարունակել դռնփակ կարգով։
Մինչ այդ Արմեն Գևորգյանի պաշտպանական կողմը իր պաշտպանյալի տեղաշարժի սահմանափակումը քննելու միջնորդություն էր ներկայացրել։ Փաստաբան Լուսինե Սահակյանը շեշտել է, որ եթե նախկինում էլ երկրից չբացակայելու մասին ստորագրություն եղել է, ապա այժմ այն ևս բացակայում է, սակայն ոստիկանությունն ապօրինի սահմանափակում է իր պաշտպանյալի տեղաշարժի իրավունքը։
Հոկտեմբերի 23–28–ն Արմեն Գևորգյանը գործուղվում է Թբիլիսի՝ Եվրոպայի խորհրդի խորհրդարանական վեհաժողովի (ԵԽԽՎ) դիտորդական առաքելության պատվիրակության կազմում Վրաստանում կայանալիք խորհրդարանական ընտրությունների դիտարկմանը մասնակցելու համար։
Սեպտեմբերի 13-ին հայտնի դարձավ, որ վճռաբեկ դատարանը բեկանել է դատավոր Աննա Դանիբեկյանի 2021 թվականի որոշումը, և Մարտի 1–ի գործն ուղարկվել է հակակոռուպցիոն դատարան՝ նոր քննության։
ՀՀ երկրորդ նախագահ Ռոբերտ Քոչարյանին, նախկին փոխվարչապետ Արմեն Գևորգյանին, պաշտպանության նախկին նախարար Սեյրան Օհանյանին և գլխավոր շտաբի նախկին պետ, ինչպես նաև ՀԱՊԿ նախկին գլխավոր քարտուղար Յուրի Խաչատուրովին մեղադրանք էր առաջադրվել ՀՀ քրեական օրենսգրքի 300.1 հոդվածով (սահմանադրական կարգը տապալելը): 2021–ի մարտի 26-ին ՀՀ Սահմանադրական դատարանը ՀՀ քրեական օրենսգրքի 300.1-րդ հոդվածը ճանաչեց անվավեր և հակասահմանադրական, նրանց նկատմամբ քրեական հետապնդումը դադարեցվեց:
