Քաղաքապետ Տիգրան Ավինյանը Երևանի քաղաքապետարանի գործակարգավորական նիստի ժամանակ հայտարարել է, որ հունվարի 1-ից ամբողջապես նոր տոմսային համակարգի անցնելն այսօրվա թվերով շատ վտանգավոր է։

Նշվել է, որ ավտոբուսներում և տրոլեյբուսներում էլեկտրոնային վճարման համակարգից օգտվել է ուղևորների միայն 1%–ը։

Ըստ նրա, մետրոպոլիտենի փորձը ցույց է տալիս, որ որոշակի միջանկյալ սահմանափակումներ պետք է մտնեն նաև ավտոբուսում և տրոլեյբուսում, գրում է Aysor.am-ը։

«1% կամ դրանից ցածր թվերը բացարձակ չեն բավարարում, եթե հունվարի 1-ից ամբողջությամբ անցնում ենք նոր համակարգի։ Խնդրում եմ, հունվարի 1-ին պատրաստ լինենք, որովհետև այսօրվա թվերով նոր տոմսային համակարգի անցնելը շատ վտանգավոր է»,-նշել է քաղաքապետը։

Նա հանձնարարել է փոխքաղաքապետ Սուրեն Գրիգորյանին, «Երևան ավտոբուս», «Երևանտրանս» և «Էլեկտրատրանսպորտ» ՓԲԸ–ների տնօրեններին միասին քննարկել և հասկանալ, թե ինչ քայլեր է պետք ձեռնարկել անհրաժեշտ արդյունքի հասնելու համար։

Միասնական տոմսային համակարգը ուժի մեջ պետք է մտներ սեպտեմբերի 1–ից, սակայն հայտարարվեց, որ այն մեկ կամ երկու ամսով կերկարաձգվի։ Նախատեսվում էր միասնական տոմսային համակարգի ներդրումը տեղափոխել նոյեմբերի 1, սակայն, ավելի ուշ քաղաքապետարանը հայտարարեց, որ միասնական տոմսային համակարգը կներդրվի 2025–ի հունվարի 1–ից։