ԱԳ փոխնախարար Վահան Կոստանյանը, անդրադառնալով Հայաստանի և Ադրբեջանի միջև խաղաղության պայմանագրի նախագծին, ասել է, որ կան հարցեր, որոնք շարունակում են մնալ չհամաձայնեցված, և բանակցությունները շարունակվում են։ Նա շեշտել է, որ ՀՀ Սահմանադրության հարցը խաղաղության պայմանագրի մաս չէ։ Փոխնախարարն այդ մասին ասել է կառավարության նիստից հետո լրագրողների հետ ճեպազրույցում

«Այս պահին նախարարների կամ երկրների ղեկավարների մակարդակով հանդիպման պայմանավորվածություն չկա, բայց հայկական կողմը շահագրգռված է հանդիպումներն ինտենսիվացնել, որ հնարավոր լինի սեղմ ժամկետում ավարտել համաձայնագրի տեքստի համաձայնեցումը»,- նշել է նախարարի տեղակալը, հայտնում է Sputnik Արմենիան։

Կոստանյանի խոսքով` ՀՀ վարչապետ Նիկոլ Փաշինյանի ու Ադրբեջանի նախագահ Իլհամ Ալիևի կազանյան հանդիպումից հետո բանակցային գործընթացում ակտիվություն է նկատվում։ Ըստ նրա՝ մասնավորապես դրանից հետո Ադրբեջանն ի վերջո ուղարկել է նախագծի 11-րդ խմբագրումը։

Մեկնաբանելով Ադրբեջանից ստացած 11-րդ խմբագրումը` Կոստանյանը նշել է, որ կան հարցեր, որոնք այս պահին վերջնականապես համաձայնեցված չեն։

«Բայց մենք դիրքորոշումները մոտեցնելու և վերջնականացնելու հնարավորություն տեսնում ենք»,- ասել է ԱԳ նախարարի տեղակալը։

Անդրադառնալով Ադրբեջանի հետ բանակցությունների ձևաչափին` փոխարտգործնախարարը նշեց՝ երկու երկրների միջև բանակցություններն ուղիղ են ընթանում։

«Բայց կան Հարավային Կովկասում կայունությամբ և խաղաղությամբ իրապես հետաքրքրված գործընկերներ, որոնք փորձում են դրականորեն աջակցել այս օրակարգին»,- նշել է Կոստանյանը։

Կոստանյանը շեշտել է, որ խաղաղության գործընթացի տրամաբանության մեջ մշտապես բարձրաձայնվում է նաև ռազմագերիների հարցը։

Վարչապետ Նիկոլ Փաշինյանը հայտարարել է, որ hայկական կողմն առաջարկել է ստորագրել խաղաղության պայմանագրի արդեն համաձայնեցված հոդվածները` մինչև Բաքվում կայանալիք COP29-ը: Ավելի վաղ Փաշինյանն ասել էր, որ 17 հոդվածից լիարժեք համաձայնեցված է 13–ը, ինչպես նաև նախաբանը։ Ադրբեջանը մերժել է այդ առաջարկը։ Ալիևը հայտարարել, է, որ առանց ՀՀ սահմանադրության փոփոխության խաղաղության պայմանագրի կնքումն անհնար կլինի։