Աշխատանքային այցով Շվեդիայում գտնվող ԱԳ նախարար Արարատ Միրզոյանը Ստոկհոլմի քաղխորհրդի նախագահ Օլլե Բուրելի հետ քննարկել է Երևանի և Ստոկհոլմի միջև գործակցության հաստատման հնարավորությունները:

Առանձնացվել են հատկապես այնպիսի ուղղություններ, ինչպիսիք են կանաչ անցումը, քաղաքային կյանքի տարբեր ոլորտներում նորարարությունների շարունակական ներդրումը, տեղական ինքնակառավարման մարմիններում կանանց ու քաղաքացիական հասարակության ներգրավվածության ավելացումը, հայտնում է ԱԳՆ–ն։

Միրզոյանը և Բուրելը մտքեր են փոխանակել ժողովրդավարական բարեփոխումների կարևորության, ժամանակակից պայմաններում ժողովրդավարության խթանման ճանապարհին առկա մարտահրավերների շուրջ՝ ընդգծելով դրանց հաղթահարման նպատակով տարբեր հարթակներում և մակարդակներով ակտիվ փոխգործակցության հրամայականը:

Հանդիպման ավարտին նախարար Միրզոյանը Բուրելի ուղղեկցությամբ կարճատև շրջայց է կատարել քաղաքային խորհրդի՝ պատմական նշանակության շենքում:

Միրզոյանը և Շվեդիայի ԵՄ հարցերով նախարար Յեսսիկա Ռոզենկրանցը Ստոկհոլմում տեղի ունեցած հանդիպմանը գոհունակությամբ ընդգծել են ՀՀ-ԵՄ գործընկերության խորացման ուղղությամբ արձանագրված առաջընթացը, որն արտացոլվել է համագործակցության տարբեր ոլորտներում և ներկայումս բանակցվող գործընկերության նոր օրակարգի նախագծում։