Վրաստանի նախկին նախագահ Սալոմե Զուրաբիշվիլին պատմական քայլ է անվանել ԱՄՆ-ՀՀ ռազմավարական գործընկերության հաստատումը։ Նա այդ մասին գրել է X-ի իր էջում։
Նա նշել է, որ այն ուղղված է տարածաշրջանի կայունությանն ու խաղաղությանը։
«Վրաստանը նույնպես կվերականգնի իր ռազմավարական գործընկերությունը Միացյալ Նահանգների հետ, հենց որ նոր ընտրություններն ապահովեն ժողովրդի կամքի իրականացումը»,- գրել է նա։
Հունվարի 14-ին Վաշինգտոնում Հայաստանի արտգործնախարար Արարատ Միրզոյանը և ԱՄՆ պետքարտուղար Էնթոնի Բլինքենը ստորագրել են ռազմավարական գործընկերության փաստաթուղթ՝ ամրապնդելով երկու երկրների համագործակցությունը։
Բլինքենը կանոնադրության ստորագրման արարողության իր խոսքում ասել է, որ առաջիկա շաբաթներին ԱՄՆ–ից մաքսային և սահմանային անվտանգության հարցերով թիմ կմեկնի Հայաստան՝ սահմանային անվտանգության կարողությունների զարգացման ուղղությամբ հայ գործընկերների հետ աշխատելու համար։
