Հայաստանի Ազգային ժողովի Եվրոպական ինտեգրման հարցերի մշտական հանձնաժողովում ակտիվորեն քննարկվում է «Եվրոպական Միությանը Հայաստանի Հանրապետության անդամակցելու գործընթացի մեկնարկի մասին» օրենքի նախագիծը, որը մշակվել է քաղաքացիական նախաձեռնության շրջանակներում։

Նախագծի հիմնական զեկուցող և նախաձեռնող խմբի լիազոր ներկայացուցիչ Արտակ Զեյնալյանը հայտնել է, որ նախագիծը ստեղծվել է՝ օգտվելով Սահմանադրությամբ նախատեսված հնարավորությունից։ Նրա խոսքով՝ ձևավորվել է 52 հոգուց բաղկացած նախաձեռնող խումբ, որը հաստատվել է նոտարի կողմից։ Այս խումբը, օրենքով սահմանված ժամկետներում, հավաքել է 60 հազար ստորագրություն, որոնք վավերացվել են ՀՀ կենտրոնական ընտրական հանձնաժողովի կողմից, հայտնում է Արմենպրեսը։

Զեյնալյանը նշել է. «Հայաստանը, ժողովրդի կամքը արտահայտելով, խնդիր է դրել ապահով, անվտանգ և բարեկեցիկ պետություն դառնալու ուղղությամբ՝ հռչակելով ԵՄ-ին անդամակցության գործընթացի մեկնարկը»։

Նրա խոսքով՝ օրենքի նախագիծը ստացել է օրենսդրական նախաձեռնության կարգավիճակ, քանի որ 60 հազար ստորագրությունները, որոնք ներկայացվել են համայնքների շուրջ մեկ քառորդից, հաջողվել է հավաքել օրենքով նախատեսված 50 օրերի կես ժամանակահատվածում։

Օրենքի հիմնավորումները ներկայացնելիս Զեյնալյանը ընդգծել է, որ դրա ընդունման նպատակը Հայաստանի ժողովրդի և իշխանությունների՝ զարգացած և քաղաքակիրթ մարդկության ընտանիքին անդամակցելու կամքն ու վճռականությունը հաստատելն է։

Նա հավելել է. «Օրենքը հռչակում է նախաձեռնողների և ՀՀ-ի՝ ԵՄ-ին անդամակցելու գործընթացի մեկնարկի մասին, ինչը կմեծացնի Հայաստանի դիմակայունությունն ու կկանխորոշի իշխանությունների քաղաքականության ուղղվածությունը»։

Նախագծի հիմնական զեկուցողը նաև նշել է, որ անդամակցությունը կնպաստի Հայաստանի բանակի արդիականացմանը՝ համապատասխանեցնելով այն ԵՄ-ի անդամ երկրների բանակների չափանիշներին, ինչպես նաև մարդու իրավունքների շարունակական զարգացմանը և տնտեսական ոլորտում բարեփոխումների իրականացմանը։ Նա նշել է, որ համագործակցությունն Արևմուտքի և ԵՄ-ի հետ կարող է հանգեցնել գործող մենաշնորհների վերացման, տնտեսության դիվերսիֆիկացման և արտադրողականության աճի։

Զեյնալյանի համոզմամբ՝ ԵՄ-ին անդամակցությունը նաև կբերի նորարարական տեխնոլոգիաների հասանելիության, ներդրումային ծրագրերի ընդլայնման, լոգիստիկ կապերի մեծացման, հայկական ապրանքների արտահանման նոր հնարավորությունների և ներքին համերաշխության ամրապնդման։

Հունվարի 9-ին Հայաստանի կառավարությունը հավանություն է տվել «Եվրոպական միությանը Հայաստանի Հանրապետության անդամակցության գործընթացի մեկնարկի մասին» օրենքի նախագծին։