Նախկին ՔՊ-ական պատգամավոր Հակոբ Ասլանյանը «Միասնական ազգային սահմանադրական կուսակացության» հիմնադիր համագումարում հայտարարել է, որ ինքը և Հովիկ Աղազարյանը զգում են իրենց նախկին թիմակիցների ճնշումները՝ հավելելով, որ անհրաժեշտ է հանրության աջակցությունը:
«Այս ընթացքում մենք ենթարկվել ենք ու ենթարկվում ենք լուրջ ճնշումների մեր նախկին թիմակիցների կողմից։ Իմ նախկին աշակերտն ինձ մեղադրելով թիմին դավաճանելու մեջ, ինձ համեմատել է ամերիկյան բանակի գեներալ Բենեդիկտ Առնոլդի հետ։ Համեմատության իմաստն այն էր, որ, իբր, ինքն է ինձ բերել ՔՊ, աճեցրել են, դիրքի են հասցրել, իսկ ես դավաճանել եմ»,-հայտարարել է Ասլանյանը, հայտնում է Aysor.am-ը։
Նա նշել է, թե մինչ ՔՊ-ական դառնալը բավական երկար քաղաքական ճանապարհ է անցել։
Ասլանյանը նաև նշել է, թե իր նախկին աշակերտը՝ Մխիթար Հայրապետյանը, ով իրեն դավաճան էր համարել, հպարտանում էր իրենով։
«Իրեն ճանաչելով և մտածելով, որ մյուս ՔՊ-ականներն էլ կլինեն իր նման արժեհամակարգ կրող երիտասարդներ, համաձայնեցի ՔՊ-ի ցուցակով մասնակցել ընտրություններին»,–ասել է նա։
Փետրվարի 8–ին ՔՊ-ից հեռացած պատգամավորներ Հովիկ Աղազարյանի և Հակոբ Ասլանյանի հիմնադրած կուսակցության համագումարն է։
Ավելի վաղ Ասլանյանն ասել է նաև, որ ինքը ստիպված է եղել ծանոթանալ Հովիկ Աղազարյանին առնչվող նամակագրությունների տեղեկատվությանը, որպեսզի ամրապնդի իր ներքին համոզմունքը։
Ազգային ժողովի պատգամավոր Հովիկ Աղազարյանի կողմից պետական գաղտնիք պարունակող տեղեկատվության արտահոսքի կազմակերպման վերաբերյալ հրապարակումն ուղարկվել է Հակակոռուպցիոն կոմիտե վարույթ նախաձեռնելու հարցը լուծելու համար:
