Ռուսաստանի նախագահ Վլադիմիր Պուտինն ու նրա ամերիկացի գործընկեր Դոնալդ Թրամփը համակարծիք են, որ Ուկրաինայի հակամարտությունը հնարավոր է լուծել խաղաղ ճանապարհով։ Այդ մասին հայտնել է ՌԴ նախագահի մամուլի քարտուղար Դմիտրի Պեսկովը։
«Կա համաձայնություն, որ այս կարգավորումը հնարավոր է խաղաղ բանակցային ճանապարհով, պետք է սպասել համատեղ աշխատանքի արդյունքներին», – նշել է Պեսկովը, հայտնում է ՌԻԱ Նովոստին։
Ռուսաստանի և ԱՄՆ-ի նախագահների հեռախոսազրույցը տեղի է ունեցել փետրվարի 12–ին՝ տևելով մոտ մեկ ու կես ժամ։ Քննարկվել են Ռուսաստանի և ԱՄՆ-ի քաղաքացիների փոխանակման, ինչպես նաև Ուկրաինայի հակամարտության կարգավորման հարցերը։
Բացի այդ, ՌԴ և ԱՄՆ նախագահները խոսել են Մերձավոր Արևելքի կարգավորման, իրանական միջուկային ծրագրի զարգացման և ռուս-ամերիկյան տնտեսական հարաբերությունների մասին։ Զրույցի ավարտին Պուտինն ու Թրամփը պայմանավորվել են շարունակել անձնական շփումները, այդ թվում՝ հանդիպում կազմակերպելու հնարավորության շուրջ։
