Մարզային բուժհաստատությունների ֆինանսական խնդիրների պատճառով կառավարությունը որոշել է փոխել դրանց կառավարման կարգը՝ կենտրոնացնելով վերահսկողությունը առողջապահության նախարարությունում: Մարզային բուժկենտրոնների կառավարումը մարզպետարաններից փոխանցվել է ՀՀ առողջապահության նախարարությանը։ Այս որոշումն ընդունվել է կառավարության նիստում։

Առողջապահության նախարարության պարզաբանմամբ՝ 40-ից ավելի հաշվետվությունների վերլուծությունը ցույց է տվել, որ մարզպետարանների աշխատակազմերը չունեն բավարար հնարավորություններ հիվանդանոցները արդյունավետ կառավարելու համար, հայտնում է Sputnik Արմենիան։

Ֆինանսական ծրագրերի հետ շեղումները գրեթե բոլոր հաստատություններում նկատելի են, իսկ վճարովի ծառայությունների սակագները՝ անհամեմատ ցածր։

Բացի այդ, հիվանդանոցների շենքերի պահպանման, սարքավորումների ձեռքբերման ու դեղորայքի մատակարարման համար երկարաժամկետ ծրագրեր չեն իրականացվում։ Ըստ նախարարության՝ հիվանդանոցները պետք է իրենց բյուջեի 40-45 տոկոսը ուղղեն այդ կարիքներին, մինչդեռ ներկայումս աշխատավարձային ծախսերը գերազանցում են 70 տոկոսը։

Աշխատավարձային ֆոնդը կրճատելու պահանջի հետ մեկտեղ նախատեսվում է նաև կրճատել անձնակազմը և փակել որոշ բաժանմունքներ։ Նախարարությունը մտադիր է մշակել հատուկ ֆինանսական առողջացման ծրագիր՝ մարզային հիվանդանոցների խնդիրները կարգավորելու համար։