Հայաստանում Ֆրանսիայի արտակարգ և լիազոր դեսպան Օլիվիե Դըկոտինյին Հայաստանի հանրային ռադիոյին տված հարցազրույցում նշել է, որ Հայաստանի և Ֆրանսիայի միջև պաշտպանական համագործակցությունը դեռ նոր է, սակայն զարգանում է բավական արագ։

Նա հայտնել է, որ 2025 թվականին այն կկենտրոնանա երեք հիմնական ուղղությունների վրա։

«Առաջինը՝ պաշտպանական տեխնիկայի տրամադրում Հայաստանին. Ֆրանսիան, ի դեպ, արևմտյան միակ երկիրն է, որը պաշտպանական տեխնիկա է տրամադրում Հայաստանին. հուսով ենք, որ այլ երկրներ ևս կհետևեն մեզ։ Երկրորդ ուղղությունը հայ զինվորականների վերապատրաստումն է թե Հայաստանում, թե Ֆրանսիայում։ Երրորդ ուղղությունը խորհրդատվական ծառայություններն են, որոնք տրամադրվում են Հայաստանի պաշտպանության նախարարությանը, ինչը հնարավորություն կտա բարեփոխել և հզորացնել հայկական բանակը»,- նշել է դեսպանը։

Անդրադառնալով Ադրբեջանի նախագահ Իլհամ Ալիևի հունվարի 8-ի հայտարարությանը, թե Ֆրանսիան և Հայաստանին զենք մատակարարող մյուս երկրները «պետք է չեղյալ համարեն այդ պայմանագրերը, և որ «Հայաստան առաքված զենքերը պետք է վերադարձվեն»՝ դեսպանն ասել է պաշտոնական Փարիզի դիրքորոշումն այն է, որ պաշտպանության ոլորտում համագործակցությունը Հայաստանի հետ շարունակվում է

«Եվ շարունակվում է նույն նպատակով՝ օգնել Հայաստանին՝ պաշտպանել իր տարածքը, իր բնակչությանը և իր ինքնիշխանությունը»,–ասել է դեսպանը։

ՀՀ պաշտպանության նախարարության և KNDS ֆրանսիական ռազմարդյունաբերական ընկերության միջև կնքվել է ռազմատեխնիկական համագործակցության պայմանագիր։ Երևանն ու Փարիզը նաև CAESAR թնդանոթների ձեռքբերման պայմանագիր են կնքել։

Ֆրանսիայի նախագահ Էմանուել Մակրոնը, ելույթ ունենալով Լոնդոնում ընթացող Եվրոպական քաղաքական համայնքի 4-րդ գագաթնաժողովում, անդրադառնալով Հայաստանի և Ֆրանսիայի միջև ռազմատեխնիկական համագործակցությանն, ասել էր, որ Ադրբեջանն այս բոլոր տարիներին ՀՀ–ից շատ է զինվել, Ադրբեջանն է պատերազմ սկսել 2020–ին։