Հայտնի գեղանկարիչ Մինաս Ավետիսյանի «Քնած կինը» (1963) կտավը դարձել է Մոսկվայում կայացած Art Investment աճուրդի գլխավոր լոտը և վաճառվել է 3,363,000 ռուբլով (ավելի քան 38,000 դոլարով)։

Կտավն ընդգրկվել էր AI № 567 աճուրդում և «21-րդ դար. Ժամանակակից ռուսական արվեստ» խորագրով 248-րդ կուրատորական աճուրդում, գրում է Kulturomania-ն։

Մինասյանը ստեղծել է մոտ 500 մեծ ու փոքր կտավ։

Հայրենի Ջաջուռում 2005 թվականից վերաբացվել է Մինասի Տուն-թանգարանը, որը փլվել էր 1988 թվականի ավերիչ երկրաշարժի հետևանքով։

Մինաս Ավետիսյանի կտավները ներկայացնում են հայկական գյուղաշխարհը, բնապատկերներ, դիմանկարներ, նատյուրմորտներ և որմնանկարներ։ Մինասի ստեղծագործություններն առանձնանում են վառ գունային հակադրություններով։ Նկարիչը զբաղվել է գեղանկարչությամբ, գրաֆիկայով, որմնանկարչությամբ, բեմանկարչությամբ՝ անդրադառնալով նկարչության բոլոր բնագավառներին։ Նրա որոշ աշխատանքներ նվիրված են հայ ժողովրդի պատմությանը, հատկապես 1915 թվականի ողբերգական իրադարձություններին, որոնցից հրաշքով փրկվել են նաև նրա ծնողները։

Նկարչի հասուն ստեղծագործական գործունեությունը տևել է ընդամենը 15 տարի՝ 1960-1975 թվականներին։ Այդ ընթացքում Մինաս Ավետիսյանը ստեղծել է մոտջ հինգ հարյուր կտավ և նույնքան գծանկար։ Նրա որմնանկարները, որոնք ստեղծվել են 1970-1974 թվականներին, տեղակայված են Երևանում, Գյումրիում և Վահրամաբերդ գյուղում։