Մասնավոր ընկերությունների թողարկած արժեթղթերի նկատմամբ հարկային արտոնություն սահմանվել է դեռևս 2020 թվականին ընդունված օրենքով, որով դրանցից ստացված եկամուտը ազատվել է եկամտային հարկից: Այդ արտոնությունը նախատեսված էր մինչև 2024 թվականի դեկտեմբերի 31-ը, սակայն ՀՀ ԱԺ պատգամավոր Բաբկեն Թունյանը առաջարկել է այն երկարաձգել ևս երեք տարով:

Հարցը քննարկվել է ԱԺ տնտեսական հարցերի մշտական հանձնաժողովի նիստում:

Տնտեսական հարցերի մշտական հանձնաժողովի նախագահի տեղակալ Բաբկեն Թունյանը պարզաբանել է, որ մասնավոր պարտատոմսերը երեք տարի ժամկետով կազատվեն եկամտային հարկից, և այդ արտոնությունը կվերաբերի 2025 թվականի հունվարի 1-ից հետո ծագած հարաբերություններին: Այսինքն՝ նախագիծն ունի հետադարձ ուժ և բարելավող բնույթ:

Կառավարությունը սատարում է այս առաջարկը: ՀՀ ֆինանսների փոխնախարար Արման Պողոսյանը նշել է, որ առանձին դրույթներ դեռ կքննարկվեն առաջինից երկրորդ ընթերցման միջև: Նա ընդգծել է, որ նախաձեռնության նպատակը ներդրումային միջավայրի կանխատեսելիության բարձրացումն է՝ միաժամանակ ապահովելով հարկման հավասար պայմաններ, որպեսզի ֆինանսական գործիքներից ստացվող եկամուտները հարկվեն միատեսակ սկզբունքներով:

Թունյանը հավելել է, որ ոլորտի ընկերությունները ներկայացրել են բազմաթիվ առաջարկներ, որոնք կքննարկվեն աշխատանքային քննարկման ընթացքում, և անհրաժեշտ շտկումներ կկատարվեն երկրորդ ընթերցման նախաշեմին:

Հանձնաժողովն ընդունել է հարցի վերաբերյալ դրական եզրակացություն: