26 փետրվարի 2025 - 18:47 AMT
Փաշինյանի գլխավորությամբ քննարկվել են Հայաստանի գիտության և տեխնոլոգիաների զարգացման հարցերը

Վարչապետ Նիկոլ Փաշինյանի գլխավորությամբ կայացել է ՀՀ վարչապետին կից Հայաստանի գիտության և տեխնոլոգիաների զարգացման խորհրդի երրորդ նիստը։

Ազգային ժողովի նախագահի տեղակալ, խորհրդի գործադիր կոմիտեի նախագահ Հակոբ Արշակյանը ներկայացրել է նախորդ նիստի արդյունքներով կատարված աշխատանքները։

Քննարկվել են գիտության ու տեխնոլոգիաների զարգացման մի շարք կարևոր ուղղություններ, ներառյալ արհեստական բանականությունը, ռոբոտատեխնիկան, ավիատիեզերական տեխնոլոգիաները, միկրոէլեկտրոնիկան, կիսահաղորդիչները, քվանտային տեխնոլոգիաները, կենսատեխնոլոգիան և կյանքի գիտությունը։

Արշակյանը նշել է, որ անհրաժեշտ են գործիքներ, որոնք թույլ կտան մշակել ռազմավարական ծրագրեր և ապահովել դրանց համապատասխանությունը պետական ընթացակարգերին։ Այս նպատակով աշխատանքային խումբը կազմել և շրջանառության է դրել Նորարարության հայկական հիմնադրամի հայեցակարգը։

Նիստի ընթացքում քննարկվել են հիմնադրամի կանոնադրական նպատակները, գործունեության հիմնական ուղղությունները և կառավարման ձևաչափը։ Անդրադարձ է կատարվել կառավարման խորհրդի կազմի՝ պետություն-մասնավոր համամասնությանը, ինչպես նաև հիմնադրամի աշխատանքների վերահսկման և հաշվետվության մեխանիզմներին։

Քննարկումների ընթացքում ներկայացվել են տարբեր դիտարկումներ և առաջարկություններ։

Վարչապետ Փաշինյանը կարևորել է հիմնադրամի աշխատանքի արդյունավետ կազմակերպումը և ընդգծել է բոլոր շահագրգիռ կողմերի միջև ակտիվ համագործակցության անհրաժեշտությունը։