ԱՄՆ նախագահի ազգային անվտանգության հարցերով խորհրդական Մայք Ուոլցը հայտարարել է, որ Ադրբեջանի նախագահի ազգային անվտանգության հարցերով խորհրդական Հիքմեթ Հաջիևի հետ զրույցում ասել է նրան, որ պետք է ազատ արձակել գերիներին և ավարտին հասցնել ՀՀ հետ խաղաղության պայմանագրի ստորագրումը։ Նա այդ մասին գրել է X-ի իր միկրոբլոգում։
Նա հավելել է, որ պետք է վերջ դրվի հակամարտությանը Հարավային Կովկասում։
«Ուրախ ենք, որ Ադրբեջանն ու Հայաստանը մեծ քայլ են կատարել առաջ և պայմանավորվել խաղաղության համաձայնագրի կնքման շուրջ։ Ես նրան ասացի, որ հիմա պետք է ավարտին հասցնել այդ խաղաղ գործարքը, ազատ արձակել կալանավորվածներին և միասին աշխատել տարածաշրջանն ավելի անվտանգ և բարգավաճ դարձնելու համար։
Ամերիկայի ոսկե դարը խաղաղություն և բարգավաճում կբերի աշխարհին, և մենք անդադար կաշխատենք այդ ուղղությամբ»,- գրել է Ուոլցը։
Մարտի 13-ին Հայաստանը և Ադրբեջանը հայտարարել են, որ վերջնական համաձայնության են հասել խաղաղության համաձայնագրի նախագծի տեքստի շուրջ։ Հայաստանի արտաքին գործերի նախարարությունը հայտնել է, որ պատրաստ է Բաքվի հետ քննարկել համաձայնագրի ստորագրման ժամկետներն ու վայրը։ Բազմաթիվ երկրներ արդեն ողջունել են Հայաստանի և Ադրբեջանի միջև ձեռք բերված համաձայնությունը՝ հույս հայտնելով, որ փաստաթուղթը կստորագրվի հնարավորինս շուտ։
Բաքվից առաջ են քաշել նոր նախապայմաններ և հայտարարել, թե դեռ վաղ է խոսել հանդիպման ժամկետների մասին:
