Միավորված ազգերի կազմակերպության սովորական սպառազինությունների ռեգիստրի (UNROCA) զեկույցի համաձայն՝ Թուրքիան վերջին երկու տարվա ընթացքում միջազգային գնորդներին մատակարարել է ավելի քան 1000 զրահամեքենա։

Փաստաթղթում նշվում է, որ 2023 թվականին 11 երկիր ստացել է 501 մարտական զրահամեքենա, մինչդեռ 2022 թվականին արտահանվել է 549 միավոր։ Ընդհանուր առմամբ, նախորդ տարվա համեմատ մատակարարումների ծավալը նվազել է 8%-ով, հայտնում է Factor.am-ը։

2023 թվականին Թուրքիայի զրահատեխնիկա ստացած երկրների ցանկում ընդգրկված են Արաբական Միացյալ Էմիրությունները՝ 180 մեքենա, Ղազախստանը՝ 68, Սաուդյան Արաբիան՝ 66, Թունիսը՝ 42, Կոտ դ’Իվուարը՝ 36, Էկվադորը՝ 35, Չադը՝ 30, Մարոկկոն՝ 20, Բանգլադեշը՝ 11, Ադրբեջանը՝ 10 և Մոնտենեգրոն՝ 3 մեքենա։

Թուրքիան 2022 թվականին 14 երկրի է մատակարարել 549 զրահամեքենա, ինչը 63%-ով գերազանցել է 2021 թվականի ցուցանիշը։ Սակայն 2023 թվականին մատակարարումների թիվը նվազել է՝ հասնելով 501 միավորի։

Թեև զեկույցում նշված չեն արտահանված մեքենաների ճշգրիտ մոդելները, Թուրքիան սովորաբար UNROCA-ին չի տրամադրում իր արտադրանքի մանրամասները։ Սակայն պաշտպանական նախկին համաձայնագրերը վկայում են, որ որոշ երկրներ, այդ թվում՝ Ադրբեջանը, շահագործում են թուրքական արտադրության COBRA II զրահամեքենաներ։ Ղազախստանը հետաքրքրված է COBRA II, TULPAR և ARMA մոդելներով, իսկ լրատվամիջոցները ենթադրում են, որ ապագայում հնարավոր է մինչև 800 մեքենայի պատվեր։

Զեկույցում ընդգծվում է, որ ՄԱԿ-ի ներկայացրած թվերը վերաբերում են միայն պաշտոնապես հայտարարագրված մատակարարումներին, ուստի իրական ցուցանիշները կարող են բարձր լինել՝ ներառելով առանձին պայմանագրերով կամ ռազմական օգնության շրջանակում տրամադրված մեքենաները։