Թբիլիսիի «Դինամո» մարզադաշտը կարող է զրկվել խաղեր հյուրընկալելու իրավունքից այն բանից հետո, երբ վրացի երկրպագուները անհարգալից վարք են դրսևորել հայ երկրպագուների նկատմամբ Ազգերի լիգայի անցումային խաղի ընթացքում:
Եթե ՈՒԵՖԱ-ն որակազրկի վրացիներին՝ անհարգալից պահվածքի համար, ապա Թբիլիսիում սեպտեմբերին կայանալիք Թուրքիայի դեմ խաղը կանցկացվի առանց երկրպագուների, հայտնում է Արմենպրեսը։
Ազգերի լիգայի անցումային փուլի պատասխան խաղում, որտեղ Հայաստանի ազգային հավաքականը հյուրընկալվել է Վրաստանի ընտրանուն, խաղը ավարտվել է 6:1 հաշվով հօգուտ վրացիների։ Հանդիպման ավարտին վրացի երկրպագուներից մի քանիսը ներխուժել են խաղադաշտ, շտապել են հայ երկրպագուների սեկտորի ուղղությամբ և նրանց վրա նետել պլաստիկե ու մետաղական տարաներ:
Հայաստանի հավաքականի հետ խաղից հետո Վրաստանի ֆուտբոլի ֆեդերացիայի նախագահ Լևան Կոբիաշվիլին արձագանքել է երկրպագուների մի մասի՝ խաղադաշտ ներխուժման և դրան հաջորդած գործողություններին, հայտնում է Auroranews.am-ը։
«Շնորհակալություն մեր հավաքականի հավատարիմ երկրպագուներին, որոնք «Դինամո Արենայում» ողջ խաղի ընթացքում աննկարագրելի մթնոլորտ ստեղծեցին: Ձեր հսկայական աջակցությունը զգացվում էր մարզադաշտում և, ինչպես միշտ, մեծ ոգևորություն էր հաղորդում թիմին: Դրա համար ևս մեկ անգամ ուզում եմ շնորհակալություն հայտնել: Սակայն պետք է անպայման նշեմ խաղից հետո տեղի ունեցած միջադեպը, երբ հանդիսականների մի փոքր մասը ներխուժեց խաղադաշտ և տհաճ իրավիճակ ստեղծեց ինչպես դաշտում, այնպես էլ հյուր թիմի տրիբունայի մոտ:
Անընդունելի է նման վերաբերմունքը հյուր թիմի երկրպագուների նկատմամբ: Այդ բացարձակ անթույլատրելի գործողությունների պատճառով մենք վիրավորեցինք ինչպես հյուր թիմի երկրպագուներին, այնպես էլ մեր հավաքականին հնարավորություն չտվեցինք հավատարիմ երկրպագուների հետ միասին տոնելու հաղթանակը:
Նման վարքը վնասում է ֆուտբոլին և ստվեր է գցում մեր երկրի միջազգային հեղինակության վրա: Այս դեպքը կարող է պատճառ դառնալ ՈւԵՖԱ-ի կողմից պատժամիջոցների կիրառմանը, ինչը կվնասի մեր հավաքականին և վրացական ֆուտբոլի երկրպագուներին:
Շնորհակալություն հյուր թիմին և նրանց երկրպագուներին, որոնք Թբիլիսիում և Երևանում ընկերական միջավայր ստեղծեցին: Հատուկ շնորհակալություն Հայաստանի ֆուտբոլի ֆեդերացիայի նախագահին և մեր գործընկերներին՝ բարձր մակարդակով հյուրընկալության համար: Երկու երկրների միջև սերտ կապը սպորտային առումով հաստատում է նաև Վրաստանի և Հայաստանի համատեղ հայտը՝ հյուրընկալելու աշխարհի ամենահեղինակավոր առաջնություններից մեկը: Հույս ունեմ, որ 2029 թվականին Վրաստանը և Հայաստանը կդառնան ՖԻՖԱ-ի մինչև 20 տարեկանների աշխարհի առաջնության համատեղ հյուրընկալողներ:
Ֆուտբոլը միավորում է մեզ և ստեղծում հաջողություն: Հատուկ շնորհակալություն մեր ֆուտբոլի հավաքականի յուրաքանչյուր անդամին, թիմի ողջ կազմին և մարզչական շտաբին, որոնք փլեյ-օֆֆի երկու հանդիպումներում ցուցաբերեցին անհավանական նվիրվածություն և հաղթողի մտածելակերպ»,- նշել է Կոբիաշվիլին։
Ազգերի լիգայի անցումային փուլի պատասխան խաղում, որտեղ Հայաստանի ազգային հավաքականը հյուրընկալվել է Վրաստանի ընտրանուն, խաղը ավարտվել է 6:1 հաշվով հօգուտ վրացիների։ Հանդիպման ավարտին վրացի երկրպագուներից մի քանիսը ներխուժել են խաղադաշտ, շտապել են հայ երկրպագուների սեկտորի ուղղությամբ և նրանց վրա նետել պլաստիկե ու մետաղական տարաներ:
