«Գոյ» թատրոնի կառավարման խորհրդի նախագահ, ռեժիսոր Սարգիս Արզումանյանը ֆեյսբուքյան իր էջում հայտնել է, որ Սունդուկյանի անվան թատրոնի տնօրեն Վարդան Մկրտչյանը հերթական հարվածն է հասցրել «Գոյ» թատրոնին այս անգամ ոչ միայն ֆիզիկապես ջնջելով այն, այլև բառացիորեն հողին հավասարեցնելով հանդիսատեսի տեղերը։
Ավելի վաղ Սունդուկյանի անվան թատրոնի տնօրեն Վադրան Մկրտչյանը հայտարարել էր, որ մայր թատրոնն ունի այնքան պոտենցիալ, որի կլուծի Գոյ թատրոնի խնդիրները։
«Սկզբում փակեց թատրոնը, հետո ջնջեց անունը, հետո պոկեց պատերից պատմությունը, իսկ հիմա անցել է վերջին քայլին՝ հեռացրել է դահլիճի նստատեղերը, որպեսզի ոչ ոք չվերադառնա, ոչ ոք չնստի, ոչ ոք չխոսի, ոչ ոք չպահանջի։ Սա ոչ թե վերանորոգում է, այլ մշակութային վանդալիզմ
Ամեն պատրվակ, որ կհնչի, սուտ է։ Ոչ ոք չի վերանորոգում թատրոն՝ նրա պատմությունը պոկելով պատերից, դռները փոխելով ու նստատեղերը վերացնելով։ Սա նպատակային ոչնչացում է։ Սա վրեժխնդրություն է։
Սա խորը ատելություն է ««Գոյ» թատրոնի, նրա արվեստի, նրա անցյալի, նրա գաղափարախոսության նկատմամբ։ Վարդան Մկրտչյանի բարոյական գնահատականը՝ կործանիչ, անարվեստ եվ թույլ մարդ։ Նա մնալու է ոչ թե որպես արվեստի գործիչ, այլ որպես մշակութային ավերիչ։
Մարդ, ով չունի ոչ արվեստի հանդեպ սեր, ոչ պատմության նկատմամբ հարգանք, ոչ էլ ղեկավար լինելու էթիկա։ Մարդ, ով ոչնչացնում է ոչ թե պարզապես նստատեղերը, այլ հանդիսատեսի և թատրոնի կապը։ Մարդ, ով ավելի շատ վախենում է դատարկ նստարաններից, քան լի դահլիճից։
Մարդ, ով վերջում մնալու է դատարկ թատրոնում, միայնակ իր ստորությունների հետ»,–գրել է նա։
Արզումանյանը հավելել է, որ «Գոյ» թատրոնը միայն պատեր ու բեմ չէ, «Գոյ» թատրոնը մարդիկ են, ովքեր պայքարելու են մինչև վերջ։
«Գոյ» թատրոնը վերադառնալու է։ Բայց Վարդան Մկրտչյանը չի լինելու այդ պատմության մեջ»,–գրել է Արզումանյանը։
35 տարվա ստեղծագործական կյանքից հետո Գոյ թատրոնը փակվել է։ ԿԳՄՍ նախարար Ժաննա Անդրեասյանը հայտարարել էր, թե Հայաստանում մասնավոր թատրոնների աջակցության ծրագրի նախագծի հաստատման պարագայում «Գոյ թատրոնի» նախկին աշխատակազմն ազատ է մասնակցելու մրցույթին եւ եթե ստանան այդ աջակցությունը, կարող են գործել այդ աջակցության պայմաններով:
