Իրանի արտաքին գործերի նախարար Սեյեդ Աբբաս Արաղչին, ամփոփելով հայաստանյան այցը, նշել է, որ շատ հաջող այց է ունեցել Երևան։
Նա հավելել է, որ Երևան կատարած իր այցն արդյունավետ է եղել՝ կենտրոնանալով երկկողմ հետաքրքրություն ներկայացնող ու տարածաշրջանային խնդիրների վրա, հայտնում է «Փաստինֆոն»։
«Հայաստանի հետ Իրանի ամուր բարեկամությունը դարերի ընդհանուր պատմության, մշակութային մտերմության և հարգանքի, ընդհանուր շահերի վրա հիմնված փոխադարձ վստահության արդյունք է։
Կովկասի մեր տեսլականը հիմնված է տարածքային ամբողջականության և ինքնիշխանության հարգման, տնտեսական համագործակցության և արտաքին խաղացողների միջամտության կանխարգելման վրա»,- նշել է Իրանի ԱԳՆ ղեկավարը։
Վարչապետ Նիկոլ Փաշինյանն իր նստավայրում հյուրընկալել է Իրանի արտաքին քաղաքական գերատեսչության ղեկավար Սեյեդ Աբբաս Արաղչիին: Արաղչին իր խոսքում նշել է, որ հայ-իրանական հարաբերությունները խարսխված են հնագույն տնտեսական ու մշակութային փոխկապվածության վրա։ Նրա համոզմամբ՝ այս հարաբերությունները ռազմավարական բնույթ են կրում, և ընթացիկ իրադարձությունները առավել ընդգծում են փոխգործակցության խորացման անհրաժեշտությունը։
Երևանում տեղի է ունեցել նաև Արաղչիի «Բանակցությունների ուժը» հայերեն թարգմանությամբ գրքի շնորհանդեսը։ Հայերեն հրատարակության առաջաբանը գրել է ՀՀ արտգործնախարար Արարատ Միրզոյանը։ «Բանակցությունների ուժը» գիրքը թարգմանվել է Հայաստանում Իրանի դեսպանատան աջակցությամբ։
