Հայտնի են «Արտավազդ 2025» թատերական մրցանակաբաշխության արդյունքները՝ ներկայացվել են տարվա լավագույն աշխատանքներն ու դերակատարումները։

Տարվա լավագույն ներկայացում է ճանաչվել «Լակոտը», հայտնում է Սոս Սարգսյանի անվան Համազգային թատրոնը։

Ներկայացման հիմքում Սոս Սարգսյանի «Լակոտը» վիպակն է: Սա մեծ սիրո մասին իրական պատմություն է, որի հերոսները մատնության և ստալինյան ռեժիմի զոհ են դառնում:Սա նաև անհատի ինքնակայացման դժվարին ուղու, բարոյական կերպարի կայացման պատմություն է:

Բեմադրիչներն են Անդրանիկ Միքայելյանը և Նարինե Գրիգորյանը։

Lավագույն մանկական ներկայացման անվանակարգում հաղթել է «Բարկանո՞ւմ ես» բեմադրությունը։ Երիտասարդական լավագույն բեմադրության կոչմանն արժանացել է «Մարդը ափի մեջ» ներկայացումը։

Տարվա լավագույն դերասան է ճանաչվել Վարշամ Գևորգյանը, իսկ լավագույն երիտասարդ դերասանուհի՝ Միլենա Ղազարյանը։

Լավագույն երաժշտության հեղինակ է դարձել Արմեն Շահինյանը, իսկ լավագույն թատերախոսական մրցանակը հանձնվել է Անի Հարությունյանին։

«Գոյ թատրոնի» կառավարման խորհրդի նախագահ, ռեժիսոր Սարգիս Արզումանյանը հրաժարվել է Ջորջ Օրուելի «Անասնաֆերմա» ներկայացման համար «Արտավազդ» մրցանակաբաշխությունում «Լավագույն երիտասարդ ռեժիսոր» անվանակարգում 2018 թվականին ստացած իր մրցանակից որպես բողոքի նշան։