ԿԸՀ-ն ամփոփել է մարտի 30–ին կայացած ՏԻՄ արտահերթ ընտրությունների նախնական արդյունքները, որոնց համաձայն Գյումրիում ոչ մի ուժի չի ստացել մեծամասնության քվեն։

ՀՀ կենտրոնական ընտրական հանձնաժողովը հրապարակել է Գյումրու 82 ընտրական տեղամասերից 81-ի նախնական ամփոփ արդյունքները։ Ընտրողների ցուցակում ընդգրկված անձանց թիվը եղել է 109,458, քվեարկության մասնակցել է 46,680 ընտրող։

Ընտրական շեմը հաջողությամբ հաղթահարած ուժերն են՝ «Քաղաքացիական պայմանագիր» կուսակցություն (Սարիկ ՄԻնասյան)՝ 36.21% քվեով, «Հայկական կոմունիստական կուսակցություն» (Վարդան Ղուկասյան) ՝ 20.5%, «Մեր ուժը համախմբված դաշինք» (Մարտուն Գրիգորյան)՝ 15.5%, «Իմ հզոր հայրենիք» (Ռուբեն Մխիթարյան)՝ 8.08% և «Մեր հայրենիքը դաշինք» (Կարեն Սիմոնյան)` 6.11%, հայտնում է Factor.am-ը։

Քանի որ նախնական արդյունքներով քաղաքական ուժերից որևէ մեկին չի հաջողվել հավաքել 50 տոկոսից ավելի ձայն, համայնքի ղեկավար ընտրելու համար քաղաքական կոալիցիաներ կազմելու անհրաժեշտություն կառաջանա։ Անցողիկ շեմը հաղթահարած ուժերից 4-ն ընդդիմադիր են և նախընտրական քարոզարշավի ընթացքում նրանց ղեկավարները հայտարարել են, որ չեն պատրաստվում կոալիցիա կազմել «Քաղաքացիական պայմանագիր» կուսակցության հետ։ Եթե ընդդիմադիր ուժերը միավորվեն, Գյումրին կունենա ընդդիմադիր քաղաքապետ, հայտնում է Արմենպրեսը։

Նախնական տվյալներով՝ Արմավիրի մարզի Փարաքար համայնքում քվեարկությանը մասնակցել է 11,526 քաղաքացի, ինչը կազմել է ընտրելու իրավունք ունեցողների 54.97 տոկոսը։ Համայնքում հաշվառված է 20,967 ընտրող։

Փարաքարում ընտրություններին մասնակցել է 4 քաղաքական ուժ՝ «Քաղաքացիական պայմանագիր» (Լյուդվիգ Գյուլնազարյան), «Միասնություն» դաշինք (Վալոդյա Գրիգորյան), «Ազգային առաջընթաց» կուսակցություն (Դավիթ Մինասյան) և «Կայունություն» կուսակցություն (Գոռ Սարիբեկյան)։

Ընտրական օրենսգրքով սահմանված է, որ ՏԻՄ համամասնական ընտրություններում կուսակցությունների համար անցողիկ շեմը 4 տոկոսն է, իսկ կուսակցությունների դաշինքների համար՝ 6 տոկոսը։