ՀՀ Արտաքին գործերի նախարարությունը պարզաբանել է՝ արդյոք Հայաստանը պատրաստվում է վճարել իր տարեկան անդամավճարը Հավաքական անվտանգության պայմանագրի կազմակերպության՝ ՀԱՊԿ բյուջե։
«Հայաստանյան կողմը պաշտոնապես տեղեկացրել է ՀԱՊԿ քարտուղարությանը, որ ձեռնպահ կմնա «ՀԱՊԿ 2024 թ. բյուջեի մասին» ՀԱՊԿ ՀԱԽ որոշման ստորագրումից և դրանով նախատեսված կազմակերպության գործունեության ֆինանսավորմանը մասնակցելուց»,–հայտնել են ԱԳՆ–ից, գրում է Sputnik Արմենիան։
Նշվել է նաև, որ ՀԱՊԿ ներքին ընթացակարգերի համաձայն՝ կառույցի տարեկան բյուջեի վերաբերյալ տեղեկատվությունը հանրային չէ։
Ավելի վաղ ՌԴ փոխարտգործնախարար Ալեքսանդր Պանկինը հայտարարել էր, որ այն դեպքում, եթե Հայաստանը մինչև 2025 թվականի ավարտը չվճարի անդամավճարը, կազմակերպության անդամ պետությունները կարող են քննարկել տարբեր սցենարներ։
Մայիսի 8-ին ՀՀ արտաքին գործերի նախարարությունը հայտնել էր Հայաստանի՝ ՀԱՊԿ գործունեության ֆինանսավորմանը չմասնակցելու որոշման մասին։ Վարչապետ Նիկոլ Փաշինյանը ևս հունիսի 14-ին հայտարարել էր, որ հաջորդ տրամաբանական քայլը կարող է լինել ՀԱՊԿ-ից դուրս գալը։ Ավելի ուշ՝ սեպտեմբերի 18-ին Համաշխարհային հայկական համաժողովի ընթացքում, Փաշինյանը նշել էր, որ Հայաստանի և ՀԱՊԿ-ի միջև հարաբերությունները մոտենում են անդառնալի փուլին։ Նրա խոսքով՝ կազմակերպության գործունեությունը վերածվել է երկրի ինքնիշխանությանը սպառնացող գործոնի։
Վարչապետի հայտարարությանը արձագանքել է Կրեմլը։ Ռուսաստանի նախագահի մամուլի խոսնակ Դմիտրի Պեսկովն նշել է, որ ՀԱՊԿ-ից որևէ վտանգ չի բխում, և այդ կազմակերպությունն իրականում կոչված է իր անդամ պետությունների ինքնիշխանության պաշտպանությանը։
