Երևանի քաղաքապետարանի գործակարգավարական խորհրդակցության ընթացքում «Երևանի կառուցապատման ներդրումային ծրագրերի իրականացման գրասենյակ» համայնքային ոչ առևտրային կազմակերպության տնօրենի պաշտոնակատար Անետա Բաբայանը ներկայացրել է 250 նոր էլեկտրական ավտոբուսի ձեռքբերման գործընթացը, որի շրջանակում ներառված են նաև դեպոների ենթակառուցվածքների արդիականացման ծրագրեր, հայտնում է 1lurer.am-ը։

«Այս պահի դրությամբ ծրագրի ներդրումային փաթեթը գնահատվում է 200 միլիոն դոլար և կարևոր կոնցեսիոն բաղադրիչ, քանի որ նախատեսվում է, որ կներառվի նաև Գլոբալ կլիմայական հիմնադրամի՝ Հայաստանի համար հասանելի ֆինանսավորումը հենց հատուկ էլեկտրական շարժունակության համար։ Նման ֆինանսավորումը հասանելի է 7 երկրների, ներառյալ Հայաստանի համար»,- ասել է Բաբայանը։