«Կոմունիստական կուսակցության» կողմից առաջադրված քաղաքապետի թեկնածու Վարդան Ղուկասյանն, որն առավելագույն ձայներն է հավաքել ընդդիմադիր թեկնածուների շրջանում, հայտարարել է, որ ՔՊ-ի հետ ճանապարհ չի գնալու։

Նա այդպես է արձագանքել մամուլում հնչած մտահոգություններին, ըստ որոնց՝ հնարավոր է, որ ինքը աջակցի «Քաղաքացիական պայմանագրին» և նպաստի վերարտադրմանը, հայտնում է Aysor.am-ը։

«Իմ միջոցով ՔՊ-ն ո՞նց պետք է վերարտադրվի, կարո՞ղ եք ասել»,–ասել է նա՝ հակադարձելով այն պնդմանը, թե Մարտուն Գրիգորյանը մտավախություն է հայտնել, որ Ղուկասյանը կարող է վերջում աջակցել իշխող ուժին։

Դիտարկմանը, թե Վանաձորի օրինակից ելնելով՝ իր դեմ կարող են քրեական գործեր հարուցել ու դրանով ճնշում գործադրել, Ղուկասյանը վստահեցրել է, որ նման մեթոդներն իր նկատմամբ արդյունք չեն ունենալու։ Ըստ նրա՝ նման մեղադրանքների համար հիմքեր չեն կարող գտնվել։ Նա ընդգծել է, որ ներկայացվող քրեական գործերը փաստացի չունեն այն բովանդակությունը, ինչ ներկայացվում է։

«Միանշանակ նման բան չի կարող լինել, որ ինձ վախեցնեն, որ քաղաքապետին կդատեն, և քաղաքապետը կգնա գործարքի ու ՔՊ-ի հետ պայմանավորվածություն ձեռք կբերի։ Ես երբեք իրենց հետ պայմանավորվածություն ձեռք չեմ բերի։ Ինչ ուզում է՝ անեն, կանգնած տեղը թեկուզ շառով էլ տան, ես ՔՊ-ի հետ ճանապարհ չեմ գնալու, չքննարկեք այդ հարցը»,–ասել է Ղուկասյանը։

Ղուկասյանը լրագրողների հետ զրույցում շնորհակալություն է հայտնել թե՛ իրեն աջակցած, թե՛ դեմ քվեարկած քաղաքացիներին՝ նշելով, որ թեկնածուներից մեկը դեռ չի արտահայտել իր դիրքորոշումը, հայտնում է Panorama.am-ը։

Նրա խոսքով՝ հաշվի առնելով, որ պետական ամբողջ համակարգը գործի է դրվել իր դեմ, գրանցված արդյունքները վատ գնահատել չի կարելի։ Ղուկասյանն ընդգծել է, որ օգտագործվել են մի շարք մեթոդներ ու հանձնարարականներ։

«Տեղեկություններ ունենք, որ զինվորներին ասել են՝ զանգեք ձեր ծնողներին, շատ բաներ։ 300 սպարտացիների նման մեր ժողովուրդը կանգնեց ամբողջ պետական ապարատի դեմ, առանց պոնչիկ, պեռաշկի, 20 հազար դրամ բաժանելու, կանգնել են իմ կողքին»,–ասել է նա։

Ինչ վերաբերում է Մարտուն Գրիգորյանին, ապա Ղուկասյանն ասել է՝ հայտարարություն է արել, եթե ընդդիմադիր ուժերից մեկն իրենից շատ ձայն հավաքի, ապա պատրաստ է առանց որևէ պաշտոնի ակնակալիքի միանալ նրան։

«Գիտեմ, որ Ռուբենն արդեն հայտարարություն է արել, ինչի համար շնորհակալություն եմ հայտնում, Կարենը՝ նույնպես։ Ես իրենց հետ կբանակացեմ, կքննարկեմ, ընդհուպ, կցանկանայի, որ իրենցից և աշխատանքի հարց լուծվեր, եթե տեսնեմ իրենց ծրագրերը, որոնք իմ ծրագրում չկան, պատրաստ ենք ի շահ քաղաքի կատարել։ Ինչ մնում է Մարտուն Գրիգորյանին, կարող ենք նստել, խոսել, բանակցել, ոչ մեկին թշնամու աչքերով չեմ նայում, ինչքան էլ վերադաս կառույցները ուզեցան խառնել Գյումրի քաղաքը, ես ասել եմ, որ թշնամի չունեմ իմ երկրում»,–ասել է նա։

Նա նաև պարզաբանել է, որ քվեարկությունից հետո Մարտուն Գրիգորյանի հետ որևէ քննարկում կամ շփում դեռ չի ունեցել։

ԿԸՀ-ն ամփոփել է մարտի 30–ին կայացած ՏԻՄ արտահերթ ընտրությունների նախնական արդյունքները, որոնց համաձայն Գյումրիում ոչ մի ուժի չի ստացել մեծամասնության քվեն։ Համայնքի ղեկավար ընտրելու համար քաղաքական կոալիցիաներ կազմելու անհրաժեշտություն կառաջանա։Եթե ընդդիմադիր ուժերը միավորվեն, Գյումրին կունենա ընդդիմադիր քաղաքապետ։

Փարաքարում ընտրություններին մասնակցել է 4 քաղաքական ուժ՝ «Քաղաքացիական պայմանագիր» (Լյուդվիգ Գյուլնազարյան), «Միասնություն» դաշինք (Վալոդյա Գրիգորյան), «Ազգային առաջընթաց» կուսակցություն (Դավիթ Մինասյան) և «Կայունություն» կուսակցություն (Գոռ Սարիբեկյան)։ Առաջատարը «Միասնություն» դածինքն է, որի մաս կազմող «Ապրելու երկիր» կուսակցությունը հայտնել է իր թեկնածուի՝ Վալոդյա Գրիգորյանի հաղթանակի մասին։