ՀՀ քննչական կոմիտեն հրապարակել է մարտի 30-ին Գյումրիում կայացած համայնքի ավագանու արտահերթ ընտրությունների ընթացքում արձանագրված ընտրախախտումների վերաբերյալ ամփոփ տեղեկություն։ ՀՀ ՆԳՆ ոստիկանության և ՀՀ գլխավոր դատախազության կողմից ստացված հաղորդումների հիմքով նախաձեռնվել է 10 քրեական վարույթ։

Խախտումներն առնչվում են ընտրության գաղտնիության խախտմանը, քաղաքացիների ընտրական կամ հանրաքվեին մասնակցելու իրավունքների իրացմանը խոչընդոտելուն, ընտրական հանձնաժողովների գործառույթների իրականացմանը միջամտելուն, ընտրական գործընթացի համար անհրաժեշտ իրերի հափշտակությանը, ինչպես նաև՝ խուլիգանության դեպքերին և ատելության, խտրականության կամ թշնամանքի քարոզչությանը։

Մասնավորապես, սոցիալական մեդիայում հայտնաբերված հրապարակումների հիմքով հարուցված գործերն առնչվում են հետևյալ դեպքերին․

Թիվ 31/02 ընտրատեղամասում ընտրողը քվեախցիկում կատարել է լուսանկարահանում։

Թիվ 31/70 և 31/17 ընտրատեղամասերում արձանագրվել են բաց քվեարկության փորձի երկու դեպք։

Շուրջօրյա խնամքի կենտրոնի շահառուները ուղղորդվել են քվեարկել որոշակի թեկնածուի օգտին։

Թիվ 31/03 տեղամասում թեկնածուի վստահված անձը ընտրողին ուղղորդել է հօգուտ իր թեկնածուի։

Թիվ 31/37 տեղամասում դիտորդը, բարձրաձայնելով խախտումների մասին և պահանջելով արձանագրել դրանք գրանցամատյանում, հեռացվել է տեղամասից։ Ըստ տեղեկության՝ հանձնաժողովի նախագահը զանգվածաբար առաջարկել է «օգնողներ» ընտրողներին, ինչը դիտորդը որակել է որպես ուղղորդում։

Թիվ 31/4 տեղամասում երկու ինքնությունը չպարզված անձ ընտրությունների օրը ճնշում է գործադրել վստահված անձի նկատմամբ։

Թիվ 31/3 տեղամաս մտած անհատը հարվածել է իրեն տեսանկարահանող դիտորդի հեռախոսին։

Թիվ 31/70 տեղամասում անհայտ քաղաքացի, ստանալով անձը հաստատող կտրոնը, ընտրություն կատարելու փոխարեն լքել է տեղամասը՝ փորձելով իր տվյալները պարունակող քվեարկության կտրոնը օգտագործել խմբային շահի համար։

Բացի այդ, նախընտրական քարոզարշավի շրջանակում, լրատվամիջոցներից մեկում հրապարակված հարցազրույցի տեսաձայնագրության հիմքով նախաձեռնվել է ևս մեկ վարույթ։ Այդ հրապարակման մեջ Ե.Մ.-ի խոսքը գնահատվել է որպես անձի նկատմամբ ատելություն, խտրականություն, անհանդուրժողականություն կամ թշնամանք սերմանելու կամ քարոզելու փորձ։

Բոլոր նշված 10 վարույթներով ընթացքի մեջ է նախաքննությունը։

Ցանկացած անձ համարվում է անմեղ, քանի դեռ նրա մեղավորությունն ապացուցված չէ օրենքով սահմանված կարգով՝ դատարանի օրինական ուժի մեջ մտած դատավճռով։