Տարածաշրջանային այցի շրջանակում Հայաստանում գտնվող Գերմանիայի նախագահ Ֆրանկ-Վալտեր Շտայնմայերն իր ինստագրամյան միկրոբլոգի սթորի հատվածում հրապարակումներ է կատարել, որտեղ ներկայացրել է այցի մանրամասները և լուսանկարներ։

Լուսանկարներից մեկում նա հրապարակել է Արցախի դրոշը, հայտնում է Auroranews.am-ը։

Կից Գերմանիայի նախագահը նշել է․ «Հակամարտությունը վերաբերում է Լեռնային Ղարաբաղի տարածաշրջանին։ Միջազգային իրավունքի համաձայն՝ տարածաշրջանը պատկանում է Ադրբեջանին, սակայն այնտեղ մեծամասնությամբ հայեր են ապրել։ Վերջին տասնամյակներում բազմիցս տեղի են ունեցել զինված հակամարտություններ»։

Նա նշել է նաև, որ սա իր առաջին այցն է Հայաստան և Ադրբեջան։

«Կարևոր հարցերի թվում, որոնք նախատեսվում է քննարկել, գլխավոր առաքելությունն է՝ հանուն Հարավային Կովկասում երկարաժամկետ կայունության և խաղաղության, երկու երկրների հետ հարաբերությունները՝ տնտեսության, գիտության և մշակույթի ոլորտում համագործակցության ամրապնդման համար»,- նշել է նա:

Պաշտոնական այցով Երևանում գտնվող Գերմանիայի նախագահ Ֆրանկ-Վալտեր Շտայնմայերը հայտարարել է, որ Ադրբեջանի հետ խաղաղության հաստատման ուղղությամբ Հայաստանը վերջին շաբաթներին դրսևորել է զգալի կառուցողականություն, և երկու երկրների միջև արդեն համաձայնեցված խաղաղության փաստաթղթի ստորագրմանը որևէ խոչընդոտ չկա։