Ամենայն հայոց կաթողիկոս Գարեգին Երկրորդը Մայր Աթոռ Սուրբ Էջմիածնում հյուրընկալել է Եվրոպական տնտեսական և սոցիալական կոմիտեի Արտաքին հարաբերությունների բաժնի նախագահ Դիմիտրիս Դիմիտրիադիսի գլխավորած պատվիրակությանը, որին ուղեկցել է Հայաստանում Եվրամիության պատվիրակության ղեկավար, ԵՄ դեսպան Վասիլիս Մարագոսը։
Զրույցի ընթացքում Գարեգին Երկրորդն իր մտահոգությունն է հայտնել նաև Հայաստանի առջև ծառացած անվտանգային մարտահրավերների, Արցախի հայկական հոգևոր-մշակութային ժառանգության ոչնչացման ու յուրացման փաստերի և Ադրբեջանում մինչ օրս պահվող հայ գերիների առնչությամբ՝ կարևոր նկատելով միջազգային հանրության կողմից հետևողական ջանքերի գործադրումը Ադրբեջանի ագրեսիվ քաղաքականության կանխման և տարածաշրջանում խաղաղության վերահաստատման հարցում, հայտնում է Մայր Աթոռը։
Հանդիպման ընթացքում կաթողիկոսը բարձր է գնահատել ԵՏՍԿ-ի ձեռնարկած ջանքերը՝ ուղղված տնտեսական կայունությանն, սոցիալական արդարությանն ու իրավունքների պաշտպանությանն՝ ընդգծելով նաև Արցախից բռնի տեղահանված հայերի խնդիրների լուծման հրատապությունը։
Ի պատասխան՝ Դիմիտրիս Դիմիտրիադիսը շնորհակալություն է հայտնել Նորին սրբությանը ընդունելության համար՝ ներկայացնելով կոմիտեի ընթացիկ ծրագրերը և Հայաստանի հետ սոցիալ-տնտեսական երկխոսության զարգացման հնարավոր ուղղությունները։
ԱՄՆ նախագահի ազգային անվտանգության հարցերով խորհրդական Մայք Ուոլցը հայտարարել է, որ Ադրբեջանի նախագահի ազգային անվտանգության հարցերով խորհրդական Հիքմեթ Հաջիևի հետ զրույցում ասել է նրան, որ պետք է ազատ արձակել գերիներին և ավարտին հասցնել ՀՀ հետ խաղաղության պայմանագրի ստորագրումը։
Ռուբեն Վարդանյանի փաստաբան Ջարեդ Գենսերը կոչ է արել Հայաստանի վարչապետ Նիկոլ Փաշինյանին ու ԱԳ նախարար Արարատ Միրզոյանին ուշադրությամբ ուսումնասիրել ԱՄՆ նախագահ Դոնալդ Թրամփի և ԱՄՆ նախագահի ազգային անվտանգության հարցերով խորհրդական Մայք Ուոլցի հայտարարությունները։
