Մարտի 31–ին ԱԺ-ում անհետ կորածների հարցով հանդիպումն ավարտից հետո անհետ կորածների հարազատները հիմնականում չեն ցանկացել խոսել հանդիպման մասին։

Լրագրողների այն հարցին, թե արդյոք ստացել են որևէ հստակ պատասխան, միաձայն արձագանքը բացասական է եղել, հայտնում է Panorama.am-ը։

«4․5 տարի է մենք մեր հարցերի պատասխանները չենք ստանում, ուղղակի ջուր են ծեծում։ Փաստեր բերեցինք, որ ԴՆԹ-ները սխալ են, բռնի կերպով անհետացածներ կան, բայց ոչ մի բան։ Ես ասացի՝ դուք փնթի աշխատողներ եք, էդքան բան»,- ասել է անհետ կորած զինծառայող Վարդան Ադոյանի մայր՝ Անահիտ Ադոյանը։

Մեկ այլ ծնող էլ հավելել է․ «Բոլորը փնթիներ են, բոլորը»։

Հանդիպմանը ներկա են գտնվել Ազգային անվտանգության ծառայության տնօրենը և պաշտպանության նախարարի տեղակալը։ Քքննարկումն անցել է լարված և բուռն մթնոլորտում։

Հանդիպումից հետո լրագրողների հետ զրույցում ԱԺ պատգամավոր Անդրանիկ Քոչարյանը հակադարձել է ծնողների պնդումներին՝ ընդգծելով, որ բոլոր հարցերը ստացել են համապատասխան պատասխաններ, հայտնում է Panorama.am-ը։

«7 ժամ ջուր ծեծել կլինի՞։ Բոլոր հարցերը ստացել են հասցեական պատասխաններ՝ տարբեր մակարդակներով։ Չի եղել մի հարց, որի պատասխանը չեն ստացել, այլ բան է՝ ինչքանով կբավարարի։ Շատերն օր առաջ ասում են՝ բա ու՞ր է մեր երեխան, բայց այդ հարցերի պատասխանը չի խնդիրը։ Պատասխանը մեր աշխատանքը ճիշտ կազմակերպելու մեջ է, որպեսզի ստանանք այդ հարցերի պատասխանները։ Ծնողներին հասկանալ պետք ա։ Ջուր ծեծելու նպատակ եթե լիներ, ապա այս հավաքը երկրորդ անգամ չէր լինի»,-ասել է նա։

«Պատիվ ունեմ» խմբակցության քարտուղար Տիգրան Աբրահամյանը գրառում է կատարել ֆեյսբուքյան իր էջում՝ անդրադառնալով Ազգային ժողովում տեղի ունեցած, փակ հանդիպմանը, որին մասնակցել են անհետ կորած զինծառայողների հարազատներն ու մի շարք բարձրաստիճան պաշտոնյաներ։

Նրա խոսքով՝ թեև տարբեր ոլորտների պատասխանատուները փորձել են անուղղակի ներկայացնել, թե կատարվում է աշխատանք անհետ կորած քաղաքացիների ճակատագրերը պարզելու ուղղությամբ, իրական պատկերը և հարցուպատասխանների բովանդակությունը հակառակն են ցույց տվել։

«Թեև անհետ կորած մեր քաղաքացիների հարազատները բազմաթիվ հարցադրումներ անելու և մեկնաբանություններ հնչեցնելու առիթներ ունեցան, սակայն իմ տպավորությամբ, իրավասու պաշտոնյաները ավելի շատ գործի իմիտացիա էին ներկայացնում, քան բավարարում իրենց ուղղված օբյեկտիվ պահանջները:

Ընդհանուր մթնոլորտը հասկանալիորեն էմոցիոնալ էր, որովհետև անհնար է սառնասրտորեն վերաբերել երկրի պաշտպանության մեկնած և սեփական օջախներ չվերադարձած անձանց շուրջ ստեղծված անորոշությանը և նրանց հարազատների ծանր ապրումներին»,–գրել է նա։

Անհետ կորածների հարազատներն ու պատգամավորները վիճել են Ազգային ժողովում։ Դահլիճից լսվել են գոռոցներ, բղավոցներ:Արդարադատության նախարար Սրբուհի Գալյանը նիստերի դահլիճից դուրս է եկել հուզված։Ավելի ուշ հայտնի է դարձել, որ վիճել են անհետ կորածների հարազատներն ու անկախ պատգամավոր Գեղամ Նազարյանը:

Ընթերցեք նաև․ Անհետ կորածների ծնողներն ու պատգամավորներն ԱԺ–ում վիճել են