ՌԴ Պետդումայում մեկնաբանել են այն տեղեկությունը, որ ՀՀ–ն պաշտոնապես տեղեկացրել է Հավաքական անվտանգության պայմանագրի կազմակերպության` ՀԱՊԿ քարտուղարությանը իր որոշման մասին՝ կազմակերպության գործունեության ֆինանսավորման վերաբերյալ փաստաթուղթը չստորագրելու մասին։

Պետդումայի պաշտպանության կոմիտեի առաջին փոխնախագահ Ալեքսեյ Ժուրավլյովը, «Ռոդինա» կուսակցությունից, ասել է, որ ՀՀ–ն հրաժարվում է ՀԱՊԿ ֆինանսավորումից, Արևմուտքին հաճոյանալու համար, գրում է ՌԻԱ Նովոստին։

«Երևանը անում է ամեն ինչ՝ Արևմուտքին հաճոյանալու համար. Հայաստանի խորհրդարանն անգամ պաշտոնական որոշում է ընդունել ԵՄ-ին անդամակցելու վերաբերյալ»,–ասել է նա։

Ժուրավլյովը նշել է, որ նման բանաձև չկա Եվրամիության որևէ անդամ երկրի մոտ, քանի որ դա անհրաժեշտ չէ նույնիսկ որպես ձևականություն։​

Նա նաև կասկած է հայտնել Հայաստանի նախորդ վճարումների վերաբերյալ ՀԱՊԿ-ին՝ ընդգծելով բաց աղբյուրներում այդ մասին տեղեկատվության բացակայությունը։

«Հիմա հրաժարվում են վճարել ՀԱՊԿ-ին, և անմիջապես հարց է առաջանում՝ իսկ երբևէ վճարե՞լ են։ Բաց աղբյուրներում այդ մասին որևէ տեղեկատվություն չկա»,–ասել է նա։

Պատգամավորը հիշեցրել է Ղազախստանում տեղի ունեցած իրադարձությունները, երբ ՀԱՊԿ ուժերը մասնակցել են կարգի պահպանմանը, և նշել է, որ այդ ժամանակ Հայաստանի 200 զինվորականները «հերոսաբար» գրավել են ոչ ոքի կողմից չպաշտպանվող հացի գործարանը, ինչից հետո նրանց գործողությունները ավարտվել են։​

Վերջում Ժուրավլյովը ենթադրել է, որ եթե Հայաստանը դուրս գա ՀԱՊԿ-ից և խզի կապերը Ռուսաստանի հետ, ապա կարող է արագ կլանվել հարևան պետությունների կողմից, որոնք տարածքային պահանջներ ունեն ՀՀ–ից՝ հավելելով, որ «ՆԱՏՕ-ից կամ ԵՄ-ից ոչ ոք մատը մատին չի խփի՝ օգնելու համար»։