Գերմանիայի նախագահ Ֆրանկ-Վալտեր Շտայնմայերի պաշտոնական էջում կատարված հրապարակումը, որտեղ նա կիսվել էր Արցախի դրոշով, հիստերիա է առաջացրել Բաքվում։
Գերմանիայի դեսպան Ռալֆ Հորլեմանին կանչել են Ադրբեջանի ԱԳՆ և բողոք ներկայացրել, հայտնում է Minval.az-ը։
Բաքուն դա համարել է երկրի «տարածքային ամբողջականության և ինքնիշխանության խախտում»։
Գերմանացի դիվանագետին տեղեկացվել է, որ այսպիսի քայլերը տարածաշրջանային այցի ժամանակ դիտարկվում են «որպես բացահայտ քաղաքական սադրանք և անթույլատրելի են»։ Ադրբեջանը պահանջել է Գերմանիայից հրապարակային ներողություն այս հրապարակման համար։
Ըստ ադրբեջանական կողմի, Գերմանիայի նախագահի կողմից հրապարակված լուսանկարը հակասում է Բեռլինի՝ Ադրբեջանի տարածքային ամբողջականության և ինքնիշխանությանն աջակցելու վերաբերյալ ավելի վաղ արված հայտարարություններին և խաթարում է ընթացիկ խաղաղ գործընթացը։
Ադրբեջանի ԱԳՆ-ն նաև շեշտել է, որ երկրում չկա վարչատարածքային միավոր «Լեռնային Ղարաբաղ» անվամբ և կոչ է արել խուսափել նման «գոյություն չունեցող, կողմնակալ և կեղծ» անվանումներից։
Տարածաշրջանային այցի շրջանակում Հայաստանում գտնվող Գերմանիայի նախագահը սոցցանցի իր էջում հրապարակել է Արցախի դրոշի լուսանկարը։
Լուսանկարին կից նա գրել է․ «Հակամարտությունը վերաբերում է Լեռնային Ղարաբաղի տարածաշրջանին։ Միջազգային իրավունքի համաձայն՝ տարածաշրջանը պատկանում է Ադրբեջանին, սակայն այնտեղ մեծամասնությամբ հայեր են ապրել։ Վերջին տասնամյակներում բազմիցս տեղի են ունեցել զինված հակամարտություններ»։
Տարածաշրջանային այցի շրջանակում Շտայնմայերն այցելելու է նաև Ադրբեջան։
Ընթերցեք նաև․ Գերմանիայի նախագահը սոցցանցում կիսվել է Արցախի դրոշով