Կենսաչափական համակարգի ներդրման մրցույթի հաղթող ընկերությունը հայտնի է` անցկացված մրցույթում հաղթող է ճանաչվել ֆրանսիական IDEMIA Identity Security France և լյուքսեմբուրգյան A.C.I. Technology S.à.r.l. ընկերությունների համատեղ կոնսորցիումը, տեղեկացնում է ՆԳ նախարարության մամուլի ծառայությունը։

Հաղթող կազմակերպությունն ընտրվել է մարտի 31-ին կայացած ընտրության փուլի եզրափակիչ նիստի ժամանակ, որը կայացել է ՆԳ նախարար Արփինե Սարգսյանի նախագահությամբ և անցկացվել է «Հայաստանի Հանրապետությունում կենսաչափական անձնագրերի և նույնականացման քարտերի տրամադրման ենթակառուցվածքի պետություն-մասնավոր գործընկերության ծրագրի» շրջանակում։

Վերլուծության արդյունքում համադրվել են երկու հայտատուի՝ տեխնիկական և ֆինանսական առաջարկները։ IDEMIA–ն և A.C.I. Technology-ն ստացել են 94․97 միավոր, մինչդեռ մրցակից AUGENTIC GmbH-ն և Imprensa Nacional – Casa da Moeda, S.A-ն՝ 79․24 միավոր։

Ծրագրի համաձայն՝ կենսաչափական անձնագրերի և ID քարտերի արտադրությունն ու տրամադրումը կմեկնարկի 2026 թվականի երկրորդ կիսամյակից։

Այս ընթացքում հաղթող կոնսորցիումը կիրականացնի ենթակառուցվածքային բոլոր աշխատանքները՝ ներառյալ շենքերի ստանդարտացումը, գրասենյակների բացումը, սերվերների և տպագրական սարքավորումների ապահովումը, ինչպես նաև ծրագրային և տեխնիկական ամբողջական վերազինումը։

2022 -ի վերջում կառավարությունը որոշել էր կասեցնել կենսաչափական անձնագրերի տրամադրումը երկամյա ժամկետով՝ շարունակելով հին նմուշի փաստաթղթերի տրամադրումը։ Ավելի քան տասը տարի նման փաստաթղթեր մատակարարել էր լեհական PWPW ընկերությունը, որի հետ պայմանագիրն ավարտվել էր 2017-ի հունվարի 1-ին, իսկ դրանից հետո նոր մատակարար պաշտոնապես չէր ընտրվել։ Հին ձևաչափի անձնագրերի տրամադրումն այդ ընթացքում մի քանի անգամ երկարաձգվել է։