Ազգային ժողովի աշխատակազմը ստացել է «Քաղաքացիական պայմանագիր» խմբակցության պատգամավոր Վիլեն Գաբրիելյանի՝ մանդատից հրաժարվելու վերաբերյալ դիմումը։ Այդ մասին տեղեկացրել է ԱԺ նախագահի մամուլի քարտուղար Մովսես Հարությունյանը, հայտնում է Factor.am-ը։

Ավելի վաղ Գաբրիելյանը ֆեյսբուքյան իր էջում հրապարակմամբ հայտնել է մանդատը վայր դնելու որոշման մասին, որը, ինչպես նշել է, պայմանավորված է եղել Գյումրիում տեղի ունեցած իր մասնակցությամբ միջադեպով։ Հետագայում այդ գրառումը Գաբրիելյանը փոփոխել է։

Մարտի 30-ին՝ Գյումրու ավագանու ընտրությունների օրը, միջադեպ է տեղի ունեցել լրագրողների և ՔՊ-ական պատգամավոր Վիլեն Գաբրիելյանի միջև։ Լրագրողի՝ Սարիկ Մինասյանի հնարավոր պարտության վերաբերյալ հնչեցրած հարցին Գաբրիելյանը արձագանքել է, թե կուրախանա։ Նա նաև նշել է. «Մեկ է` 2026-ին իշխանությունը փոխվելու է, խի՞ եմ ես մանդատս հիմա վայր դնում»։