Քրեական ոստիկանության Շիրակի մարզային վարչության աշխատակիցները մարտի 26-ին ստացել են օպերատիվ բնույթի տեղեկություն այն մասին, որ Հրազդան քաղաքի 24-ամյա մի բնակիչ զբաղվել է թմրամիջոցների տարածմամբ՝ Գյումրիի տարբեր հատվածներում թմրանյութով փաթեթներ տեղադրելով։

Նույն օրը՝ ժամը 17:15-ին, ոստիկանները Օզանյան և Սահմանապահների փողոցների խաչմերուկում ձերբակալել են նշված երիտասարդին և տեղափոխել են մարզային վարչություն։

Անձնական խուզարկության արդյունքում նրա ուսապարկում հայտնաբերվել է ութ փաթեթ, որոնք փակված են եղել կպչուն ժապավենով։ Երիտասարդը հայտնել է, որ փաթեթներում պարունակվում է կանեփ տեսակի թմրամիջոց, որն իր խոսքով վերցրել է տելեգրամյան ալիքից՝ Երևանից, նպատակ ունենալով դրանք տեղադրել Գյումրիում։ Նա նաև նշել է, որ արդեն երեք փաթեթ տեղադրել է և պատրաստ է ցույց տալ դրանց տեղակայման վայրերը։ Բացի այդ, ուսապարկում հայտնաբերվել են նաև դեղնականաչավուն զանգվածով նյութեր և մոխրացած հետքերով կաթուցիչ։

Շիրակի մարզի քննչական վարչությունում հարուցվել է քրեական վարույթ՝ ՀՀ քրեական օրենսգրքի 393-րդ և 396-րդ հոդվածներով։

Քննչական խմբի կողմից զննություն է իրականացվել Մայակովսկու փողոցում, որտեղ հայտնաբերվել և առգրավվել են երիտասարդի տեղադրած երեք փաթեթները։

24-ամյա Հրազդանի բնակիչը տեղափոխվել է ձերբակալվածների պահման վայր, իսկ նախաքննությունը շարունակվում է։