Հայաստանում 2024 թվականին ընտանեկան բռնության դեպքերի քանակը զգալիորեն աճել է՝ մտահոգիչ պատկեր ներկայացնելով համեմատած նախորդ տարվա հետ։ Այդ մասին նշված է ՀՀ գլխավոր դատախազության 2024 թվականի գործունեության հաշվետվության մեջ։ Հաշվետվության մեջ առանձնացվել է, որ հատկապես կտրուկ աճ են արձանագրել թե՛ ֆիզիկական, թե՛ հոգեկան բռնության դեպքերը

Պաշտոնական թվերի համաձայն՝ 2024 թվականին արձանագրվել է 934 դեպք, որոնք առնչվել են ընտանեկան բռնության ֆիզիկական դրսևորումներին, մինչդեռ 2023-ին այդ ցուցանիշը եղել է 372։ Սա ենթադրում է աճ 562 դեպքով կամ 151 տոկոսով։ Հոգեկան բռնության դեպքերն էլ 2024 թվականին կազմել են 166, մինչդեռ 2023 թվականին՝ 46։ Այս պարագայում աճը կազմել է 120 դեպք կամ 261 տոկոս, հայտնում է Արմենպրեսը։

Ընդհանուր առմամբ՝ 2024-ին արձանագրվել է ընտանեկան և կենցաղային բռնության 1360 դեպք, որոնցից 1100-ը՝ այսինքն 81 տոկոսը, եղել են ֆիզիկական և հոգեկան բռնության դեպքեր։ 2023 թվականին արձանագրված 508 դեպքից 418-ն է՝ այսինքն 82 տոկոսը, եղել նման բնույթի։

Բացի այդ, ավելացել են բռնության առավել ծանր հետևանքներով դրսևորումները։ Մասնավորապես, եթե 2023 թվականին ընտանեկան բռնության հետևանքով արձանագրվել է 3 սպանություն, ապա 2024 թվականին նման դեպքերի թիվը հասել է 13-ի։ Դիտավորյալ առողջությանը ծանր վնաս պատճառելու դեպքերն էլ աճել են՝ 2023-ի 8-ից հասնելով 15-ի։

Դատախազությունն ընդգծել է պետական մարմինների համագործակցության կարևորությունը ընտանեկան բռնության դեմ պայքարում։ Ինչպես նշված է հաշվետվության մեջ՝ 2024-ին Դատախազության ներկայացուցիչները շարունակաբար ներգրավված են եղել ընտանեկան և կենցաղային բռնության հարցերի վերաբերյալ քննարկումներին՝ կապ ապահովելով տարածքային ստորաբաժանումների ու Ոստիկանության միջև՝ նպատակ ունենալով ապահովել արդյունավետ արձագանք՝ կոնկրետ քրեական վարույթների շրջանակում։

2025 թվականի հունվարի 17-ին, ընտանեկան բռնության դեմ պայքարի արդյունավետությունը բարձրացնելու համար, ձևավորվել է աշխատանքային խումբ՝ կազմված Դատախազության, Քննչական կոմիտեի և ՆԳ նախարարության ներկայացուցիչներից։

2024 թվականին Արդարադատության ակադեմիայում 35 դատախազ մասնակցել է վերապատրաստման ծրագրերին, որոնք վերաբերում են բռնության ենթարկված անձանց հետ աշխատանքին, կանխարգելման ուղիներին ու իրավական արձագանքներին։