Հայաստանում մշակութային ու ստեղծարար ոլորտների զարգացմանն ուղղված «Կատապուլտ» ծրագիրն ամփոփվել է հանդիսավոր միջոցառմամբ։ Ներկայացվել է «Երևան» ամսագրի հատուկ համարը։
ԵՄ դեսպան Վասիլիս Մարագոսն իր ելույթում նշել է, որ նախաձեռնությունը միտված է հայկական հասարակության ու տնտեսության առանցքային ոլորտների զարգացմանը՝ առաջ մղելով ստեղծարարությունն ու նորարարությունը։
«Հայաստանը եվրոպական մշակույթի կարևոր մասնիկներից է և աշխարհին հայտնի է նախևառաջ մշակույթով, ինչպես նաև մարդկանց տաղանդով ու ստեղծագործականությամբ: Մենք այստեղ ենք՝ այդ գործընթացին աջակցելու համար»,- ասել է ԵՄ դեսպան Վասիլիս Մարագոսը։
Նա նշել է, որ թեև «Կատապուլտ» ծրագիրն ավարտվում է, բայց մշակութային կապերի ամրապնդմանն ուղղված համագործակցությունը շարունակվելու է՝ դառնալով ավելի ամուր։
ՀՀ կրթության, գիտության, մշակույթի և սպորտի նախարար Ժաննա Անդրեասյանը նշել է, որ ծրագիրն էական փոփոխություններ է մտցրել մշակութային ընկալումներում։
«Ստեղծարար արդյունաբերության ոլորտում այսօր արդեն կարող ենք խոսել նոր փուլի մասին, որը մշակույթի ոլորտում հանրային տեսանելիություն ունեցող փոփոխություններ պետք է բերի։ Ակնհայտ է, որ հանրության շրջանում մշակույթի հանդեպ վերաբերմունքի փոփոխության լուրջ կարիք ունենք, և այս առումով համատեղ աշխատանքներն ուղղված են մշակույթի ինքնաբավության բարձրացմանը»,- ասել է նա։
Նախարարն ընդգծել է, որ մշակույթի ոլորտը կարող է դառնալ ոչ միայն հասարակության, այլև տնտեսության ամենակարևոր շարժիչ ուժերից մեկը:
ԿԳՄՍ նախարարության փոխանցմամբ՝ «Կատապուլտ» ծրագիրն իր սկիզբն է առել 2022 թվականին՝ իրականացվելով ՀՀ կրթության, գիտության, մշակույթի և սպորտի նախարարության ու Հայաստանում Եվրամիության պատվիրակության համատեղ ջանքերով։ Նախաձեռնության հիմնական նպատակն է մշակութային և ստեղծարար ոլորտի կայուն էկոհամակարգի ձևավորումը Հայաստանում՝ զուգահեռաբար զարգացնելով անկախ արվեստագետների մասնագիտական կարողությունները և համագործակցության հնարավորությունները։
Ստեղծարար տնտեսության խթանումը համընկել է ՀՀ մշակութային քաղաքականության ռազմավարական ուղղությունների և 2021-2026 թթ. կառավարության գործողությունների ծրագրում արձանագրված առաջնահերթությունների հետ։ Ծրագիրն իրականացվել է ԵՄ ֆինանսական աջակցության շրջանակում՝ համագործակցելով ՀԲԸՄ հայաստանյան գրասենյակի հետ։ Գործընկեր կառույցներ են եղել նաև ՀՀ էկոնոմիկայի ու Բարձր տեխնոլոգիական արդյունաբերության նախարարությունները։
