ՀՀ ԶՈւ ԳՇ նախկին պետ, գեներալ-գնդապետ Մովսես Հակոբյանին և ՀՀ ԶՈւ հրթիռային զորքերի և հրետանու վարչության նախկին պետ, գեներալ-մայոր Արմեն Հարությունյանին մեղադրում են պաշտոնեական անփութության մեջ, հայտնում է «Փաստինֆոն»։
Քրեական գործով նախաքննությունն ավարտված է, և այն վերջերս փոխանցվել է Երևանի ընդհանուր իրավասության քրեական դատարան։ Գործն մակագրվել է դատավոր Մասիս Մելքոնյանին։
Ըստ մեղադրանքի՝ Արմեն Սամսոնի Հարությունյանը, 2017–ի մայիսից զբաղեցնելով ՀՀ ԶՈւ հրթիռային զորքերի և հրետանու պետ-վարչության պետի պաշտոնը, պաշտոնատար անձ լինելով, խախտել է «ՀՀ զինված ուժերի ներքին ծառայության կանոնագիրքը հաստատելու մասին» օրենքի դրույթները։ Իր ծառայողական պարտականություններին անբարեխիղճ և անփույթ վերաբերմունքի արդյունքում առաջ են եկել ծանր հետևանքներ։
Նույն մեղադրանքը ներկայացվել է նաև Մովսես Հակոբյանին։ Ըստ քրեական գործի՝ վերջինս 2015-2016 թթ․ զբաղեցրել է ՀՀ պաշտպանության նախարարի տեղակալ-ՆՏԱ դեպարտամենտի պետի պաշտոնը և, պաշտոնատար անձ լինելով, իր պարտականությունները պատշաճ չի կատարել ծառայության նկատմամբ անփութության պատճառով։ Այս անփույթ վարքագիծն առաջացրել է ծանր հետևանք՝ առանձնապես խոշոր չափերի գույքային վնաս։
Արմեն Հարությունյանի և Մովսես Հակոբյանի նկատմամբ որպես խափանման միջոց է կիրառվել երկրից չբացակայելու արգելք, իսկ Հակոբյանի դեպքում նաև 10 միլիոն դրամի գրավ։ «Դատալեքսում» առկա տեղեկությունների համաձայն՝ հենց այս գործի շրջանակում էլ ներկայացվել է պահանջը՝ պատճառված վնասի փոխհատուցման վերաբերյալ։
Ավելի վաղ հայտնի դարձավ, որ ՀՀ դատախազությունում ընթանում է իրավական գործընթաց, որի ընթացքում ՀՀ ԶՈւ ԳՇ նախկին պետ Մովսես Հակոբյանից և ՀՀ ԶՈւ հրթիռային զորքերի և հրետանու վարչության նախկին պետ Արմեն Հարությունյանից պահանջվում է մոտ 4.5 մլրդ դրամ՝ որպես պետությանը հասցված վնասի փոխհատուցում։ Հայցը ներկայացվել է հակակոռուպցիոն քաղաքացիական դատարան՝ 2025–ի մարտի 17-ին և նույն օրը մակագրվել է դատավոր Լիլի Դրմեյանին։
ՀՀ գլխավոր դատախազությունից «հաստատել էին, որ 2025-ի մարտի 14-ին ՀՀ զինվորական կենտրոնական դատախազությունը հայց է ներկայացրել ՀՀ հակակոռուպցիոն դատարան՝ ընդդեմ Մովսես Հակոբյանի և Արմեն Հարությունյանի՝ համապարտությամբ՝ որպես ոչ օրինաչափ վարքագծի արդյունքում պետությանը պատճառված վնասի հատուցում, հօգուտ Հայաստանի Հանրապետության 4 միլիարդ 370 միլիոն 985 հազար դրամ բռնագանձելու մասին։ Քրեական գործի մանրամասները չեն բացահայտվել՝ նախաքննական գաղտնիքին հղումով, իսկ Մովսես Հակոբյանն արձագանքել է, որ «տեղեկություն չունի, առհասարակ մամուլից է տեղեկացել հայցից»։