Հայաստանի նախագահ Վահագն Խաչատուրյանն ընդունել է Չեռնոգորիայի արտաքին և եվրոպական գործերով փոխվարչապետ Ֆիլիպ Իվանովիչին։ ՀՀ նախագահը կարևորել է նման բարձրաստիճան այցերն ու հանդիպումները՝ դրանք գնահատելով որպես քաղաքական օրակարգի ձևավորման և երկկողմ հարաբերությունների ամրապնդման կարևորագույն միջոց։

Չեռնոգորիայի արտաքին և եվրոպական գործերով փոխվարչապետն ասել է․ «Մեզ համար մեծ պատիվ է այցելել Երևան և հանդիպել Ձեզ հետ։ Անկասկած, ինչպես նշեցիք, իմ այցի հիմնական նպատակն է խթանել Հայաստանի և Չեռնոգորիայի հարաբերությունները, որոնք հիմնված են երկարամյա բարեկամության վրա, և մենք ուրախ ենք այս ուղղությամբ քայլեր ձեռնարկելու համար»։

ՀՀ նախագահն ընդգծել է, որ արդյունավետ համագործակցություն ապահովելու նպատակով անհրաժեշտ է ակտիվացնել փոխադարձ հետաքրքրություն ներկայացնող ոլորտներում առկա ներուժի օգտագործման համատեղ ջանքերը։

«Վստահ եմ, որ Ձեր այցելության ընթացքում նախանշել եք այն հիմնական ուղղություններն ու հնարավորությունները, որոնք կնպաստեն մեր երկու երկրների հարաբերությունների առավել զարգացմանը»,- նշել է Խաչատուրյանը։

Հանդիպման ընթացքում կողմերը քննարկել են երկկողմ համագործակցության հեռանկարները։ Նախագահ Խաչատուրյանն ու փոխվարչապետ Իվանովիչն անդրադարձ են կատարել այն ոլորտներին, որտեղ հնարավոր է խորացնել և ընդլայնել երկկողմ փոխգործակցությունը՝ հիմնվելով կողմերի ընդհանուր հետաքրքրությունների վրա։

Զրույցի ընթացքում հատուկ ուշադրություն է հատկացվել գիտակրթական նախագծերի իրագործման, ինչպես նաև մշակույթի ոլորտում գործակցության զարգացման հեռանկարներին։ Կողմերը համաձայնության են եկել, որ անհրաժեշտ է քայլեր ձեռնարկել առկա հնարավորությունները լիարժեք իրացնելու համար։

Քննարկման կարևոր կետերից է եղել նոր կապերի ստեղծման և առկա հարաբերությունների ամրապնդման հարցը՝ հատկապես քաղաքական, տնտեսական, զբոսաշրջության և բիզնեսի ոլորտներում։ Նախագահ Խաչատուրյանը շեշտել է, որ այս ուղղություններով համատեղ ջանքերի ակտիվացումը նպաստում է երկու երկրների առաջընթացին։

Հանդիպման վերջում երկու պետությունների ներկայացուցիչները վերահաստատել են իրենց հանձնառությունը ժողովրդավարական արժեքների և ինստիտուտների շարունակական զարգացման հարցում՝ դրանք դիտարկելով որպես հետագա բարգավաճման և միջազգային հանրության մեջ դիրքի ամրապնդման կարևոր նախադրյալ։

Կողմերը պայմանավորվել են շարունակել բարձր մակարդակի երկխոսությունն ու համագործակցությունը՝ ընդգրկելով փոխշահավետ բոլոր ոլորտները։