Հայաստանում համակարգչային հափշտակությունների դեպքերի զգալի աճ է գրանցվել։ Այդ մասին ասվում է ՀՀ գլխավոր դատախազության 2024 թվականի հաշվետվության մեջ։

Մասնավորապես, եթե 2023 թվականին գրանցվել է 630 դեպք, ապա ընթացիկ տարում դրանց թիվը հասել է 788-ի, ինչը նշանակում է աճ 158 դեպքով կամ 25․1 տոկոսով։ Բացի այդ, աճ է արձանագրվել նաև հանցանքի բացահայտման մակարդակում՝ նախորդ տարվա 1․7 տոկոսի փոխարեն այն կազմել է 2․5 տոկոս, հայտնում է Արմենպրեսը։

Դեպքերի կեսից ավելին՝ 428-ը կամ 54,3 տոկոսը, արձանագրվել է Երևան քաղաքում, որտեղ ցուցանիշն աճել է 47-ով կամ 12․3 տոկոսով։

Նշվել է, որ կիբերհափշտակությունների տարածման պատճառները մի քանիսն են՝ համակարգչային տեխնոլոգիաների ու ծրագրերի արագ զարգացումը, ֆինանսական ծառայությունների թվայնացման ակտիվ ընթացքը, նորարարական լուծումների ներմուծումը, ինչպես նաև տեղեկատվական ու բանկային համակարգերի անվտանգության բացերը։ Ավելին՝ քաղաքացիները հաճախ անտեղյակ են բանկային քարտերի անվտանգության կանոններին կամ էլ պարզապես անտեսում են դրանք։

Հաշվետվությունում շեշտադրվում է, որ հանցավոր խմբերը հաճախ օգտագործում են այն հանգամանքը, որ քաղաքացիները անհարկի կերպով կիսվում են իրենց անձնական տվյալներով՝ մասնավորապես բանկային քարտերին վերաբերող տեղեկատվությամբ, ներառյալ քարտի վրա նշված բոլոր թվերը։ Դատախազությունը վերջին մի քանի տարիների ընթացքում պարբերաբար իրականացրել է իրազեկման աշխատանքներ՝ հանրությանը զգուշացնելով այս տեսակի հանցագործությունների մասին և հորդորելով խստորեն պահպանել անվտանգության կանոնները։

Կիբերհափշտակությունների մեծ մասը պատկանում է բազմադրվագ գործերի շարքին։ 2024 թվականին դատարան ուղարկված գործերից մեկում ընդգրկված է եղել 7882 դրվագ, մեկ այլում՝ 1404 դրվագ, իսկ երրորդում՝ 712 դրվագ։