Հռոմի պապ Ֆրանցիսկոսի մարտի 28-ի որոշմամբ կսրբադասվի Հայոց ցեղասպանության նահատակ, հայ կաթոլիկ արքեպիսկոպոս երանելի Իգնատիոս Մալոյանը, հայտնում է Vaticannews-ը։

Սրբադասվելու է ևս 2 հոգևորական` Երկրորդ համաշխարհային պատերազմի ժամանակ սպանված Պապուա Նոր Գվինեայի աշխարհական կաթողիկոսը և վենեսուելացի կրոնական մի քույր, որn իր կյանքը նվիրել է կրթությանը և աղքատներին։

Երանելի Իգնատիոս Շուքրալահ Մալոյանը ծնվել է 1869 թվականի ապրիլի 19-ին, այժմյան Թուրքիայի տարածքում գտնվող Մարդին քաղաքում։ 14 տարեկանում նա միացել է Լիբանանի Զմմառի վանական համայնքին և 1896 թվականին ձեռնադրվել է՝ ստանալով Իգնատիոս անունը։

Իր քարոզչական գործունեությամբ նա աչքի է ընկել Ալեքսանդրիայում՝ հանդես գալով ինչպես արաբերեն, այնպես էլ թուրքերեն լեզուներով։ Ավելի ուշ նա նշանակվել է Կահիրեի Պատրիարքական փոխանորդ, սակայն տեսողության վատթարացման պատճառով վերադարձել է Ալեքսանդրիա։ 1911 թվականին նշանակվել է Մարդինի Պատրիարքական Փոխանորդ։

Հայոց ցեղասպանության օրերին նա ձերբակալվել է տասնյակ քրիստոնյաների հետ միասին և դատարանի առաջ կանգնեցրել։ Երբ նրան ասել են, որ կարող են խնայել նրա կյանքը, եթե իսլամ ընդունի, Իգնատիոս Շուքրալահ Մալոյանը հրաժարվել է։

«Մենք երբեք անհավատարիմ չենք եղել պետությանը… բայց, եթե դուք մեզ խնդրում եք անհավատարիմ լինել մեր կրոնին, դա երբեք չի լինելու»,–ասել է նա։

Դրանից հետո նրան ենթարկել են խոշտանգումների և կարճ ժամանակ անց՝ մահապատժի։ 2001 թվականին Սուրբ Հովհաննես Պողոս II պապը նրան հռչակել է երանելի։