Ապրիլի 1-ին Մայր Աթոռ Սուրբ Էջմիածնում հյուրընկալվել է պաշտոնական այցով Հայաստան այցելած Գերմանիայի Դաշնային Հանրապետության նախագահ Ֆրանկ-Վալտեր Շտայնմայերը տիկնոջ հետ։

Հաշվի առնելով, որ Գերմանիայի նախագահը նախատեսում է այցելել նաև Ադրբեջան, Ամենայն Հայոց կաթողիկոս Գարեգին Բ–ն նրան հորդորել է բարձրաձայնել հայ ռազմագերիների ազատ արձակման, Արցախի ժողովրդի օրինական իրավունքների և հայկական հոգևոր-մշակութային ժառանգության պահպանման անհրաժեշտությունը։

Նորին Սրբության խոսքի համաձայն, առկա հարցերի հետևողական բարձրաձայնման շնորհիվ վերջիններիս արդար հանգուցալուծմամբ միայն հնարավոր պիտի լինի տարածաշրջանում կայուն խաղաղություն հաստատել և ժողովուրդների խաղաղ գոյակցության պայմաններ ստեղծել, հայտնում է Մայր Աթոռի տեղեկատվական համակարգը։

Գերմանիայի նախագահ Շտայնմայերը, շնորհակալություն հայտնելով Նորին Սրբություն Գարեգին Երկրորդ կաթողիկոսին քրիստոնեական հնագույն սրբավայր այցելելու հնարավորության համար, կարևորել է կրոնների դերակատարությունը ժողովրդների կյանքում խաղաղության և համերաշխության ապահովման գործում։ Շտայնմայերը հավաստիացրել է, որ իր միջնորդական ջանքերը կգործադրի ի նպաստ տարածաշրջանում վերջնական խաղաղության հաստատման»։

Կաթողիկոսն ընդգծել է, որ հայ ժողովուրդը իր պատմության ընթացքում բազմաթիվ փորձություններ է հաղթահարել՝ Տեր Հիսուս Քրիստոսի օրինակով, այդ թվում՝ 20-րդ դարի սկզբի ցեղասպանությունը։ Նա նաև համոզմունք է հայտնել, որ նույն հավատով ու տոկունությամբ հայ ազգը կհաղթահարի նաև վերջին տարիների ճգնաժամերն ու մարտահրավերները։

Այնուհետև Վեհափառ Հայրապետը և Գերմանիայի նախագահը աղոթք են բարձրացրել առ Աստված՝ ողջ մարդկության բարօրության ու խաղաղության համար՝ կանգնելով Իջման Սուրբ Սեղանի առջև։

Այցի ավարտին նախագահ Շտայնմայերը՝ Գերմանիայի Հայոց թեմի առաջնորդ Տ. Սերովբե եպիսկոպոս Իսախանյանի ուղեկցությամբ, շրջել է Մայր Տաճարի տարածքում և ծանոթացել վերջին շրջանում հիմնանորոգված սրբավայրի պատմությանը։